KRALENDIJK – Presidente di Kamer van Koophandel Huub Groot a menshoná resientemente na apertura di e siman di empresariado kon orguyoso e ta ku lansamentu di e programa piloto ‘KvK Academy. 

Huub Groot ta presidente di e direktiva di KvK. “Mi ta orguyoso di ta aki, na lansamentu di e programa piloto di ‘KvK Academy’. Awor mas ku nunka ta hopi importante pa e empresario ta den union ku otronan i usa mas tantu posibel su kreatividat. Komersiantenan tin un tarea enorme pa por sobrebibí den e temporada di Covid-19. Tur hende ta den un lucha pa sobrebibí i kontinuá. Den e temporada difísil aki bo ta sa ken ta e komersiantenan di bèrdat. Nan tin hopi kreatividat pa por lanta i mantené nan negoshi, apesar di e situashon. Mirando tur partisipante i e treinernan, e entusiasmo ku nan tin, sigur na ta logra”, Huub Groot a bisa.  

Cherethy Kirindongo, direktor di KvK a menshoná ku for di 2019 KvK a mira e nesesidat pa bin ku un kuríkulo, asina lanta e empresario su konosementu pa stabilisá nan i asina nan ta mas eksitoso komo empresario. Danki na ministerio di asuntunan ekonómiko, nos a haña supsidio pa por a desaroyá e kuríkulo. Awe ta e parti piloto di ‘KvK Academy’. E kuríkulo ta konsistí di 10 sekshon. No ta trata di un seminario, sinembargo un workshop. Loke nan siña, nan tin ku implementé den nan negoshi. E idea pa  otro aña kuminsá lansa e kuríkulo algun bia durante aña. Ta hopi importante pa nos haña hopi remarke serka esnan ku ta partisipá awor, pa momentu nos inisiá e programa e ta stabil. KvK Academy a bira un realidat debí na e treinernan(10), ku tin hopi amor pa loke nan ta hasiendo. Nos ta orguyoso ku e programa i otro aña tin hopi mas oportunidat pa mas hende partisipá”, Cherethy Kirindongo a bisa.  

Diputado Elvis Tjin Asjoe na nòmber di Boneiru a papia i a menshoná ku nan ta kontentu ku e asina yama; skol pa siña hasi negoshi di Kámara di Komersio. “Gobièrnu ta finansiá Kámara di Komersio ku fondo. Kámara di Komersio ta hasiendo un tremendo trabou. Bon pa tende ku Ministerio di ekonomia ta duna un man den e proyekto. Spera amplia e skol pa siña hasi negoshi, i apesar ku nos ta un isla chikitu, laga nos pensa amplio i eksportá nos konosementu nos produkto di Boneiru”, entre otro diputado Tjin Asjoe a bisa.

Felis siman di empresariado i pabien ku e lansamentu di e KvK Academy. Di e manera aki Amelia Pieternela a papia ku esnan presente. “Awe ainda esnan ku a kuminsá no ta eksitoso, sinembargo sigui pasobra despues e ta duna resultado. Mi ta plania pa nos bai hasi mas kos den futuro. Si bo konosé hende ku ta bai e lès, aserka nan i tuma konseho serka nan i asina bo ta kuminsá bai den e direkshon pa stabilidat den bo negoshi”, entre otro Amelia Pieternella a bisa.  

Share This
error: Content is protected !!