KRALENDIJK – Kampionato biar Bola-8 pa ekiponan ku ta afiliá na FeBiBo ku ta e federashon di biar di nos isla, ta dediká na sr. Erwin “Chino” Phelipa i sr. Ernesto “Nechi” Wijman, por sierto dos persona ku hopi aña di eksperensia i den e deporte di biar di nos isla.

E kampionato ta kuminsá otro siman djaluna 23 di novèmber 2020 den sala di biar di Kompleho Deportivo Jorge Nicolaas na Kaya Amsterdam pa mitar di anochi sin públiko.

E promé partido djaluna awó ta entre e ekiponan Azteca i Sharp Shooters
E desishon aki reunion di FeBiBo ku su ekiponan afiliá, a yega na dje djamars último den oranan di anochi na Kompleho Deportivo Jorge Nicolaas na Kaya Amsterdam.

Durante e reunion a yega na sierto puntonan ku a keda palabra den e reunion.
Puntonan palabrá:
• Lo hunga 1 wega pa dia pa por tin ménos hende den sala.
• Tur hungadó mester registrá na entrada i lo tin “handsanitizer” na entrada di sala di wega.
• Kada ekipo tambe mester sòru pa tin “handsanitizer” pa su hungadónan.
• NO TA PERMITÍ PÚBLIKO, solamente e hungadónan di e ekiponan ku tin wega e dia ei lo por ta den e sala.
• Lo apliká mesun sistema di e final di kampionato 2019/2020.
Lo usa e mesa na nort i esun di suit lo keda será.
• Rèfri di kada wega MESTER usa “handschoen” i despues di kada sèt lo desinfektá e mesa.
• Ekiponan lo yuda ku e parti di kontròl i avisá tur hungadó pa mantené na e reglanan di distansia sosial i di higiena.
• Pa yanüari lo disidi ku lo mantene 1 wega pa dia òf e lo bira manera e tabata sèmper di 2 wega pa dia dependiendo di e situashon di Covid 19.

Di parti FeBibo ta deseá tur ekipo tur klase di éksito na e kampionato ku ta kuminsá djaluna otro siman.
E promé partido mitar di ocho anochi ta entre e ekiponan Azteca i Sharp Shooters.

Share This
error: Content is protected !!