KRALENDIJK – Outomobilistanan ta kore ku velosidat haltu i iresponsabel dilanti di hòspital. Esaki ta loke algun suidadano a remarká na mesa di redakshon di Notisia Live99.9 FM. Un di e motibunan ta ku for di djadumingu despues ku a sera diferente kaya den sentro di suidat,(debí ku gasoil a basha riba kaya) esaki ta pone ku tráfiko ta desviá i usa e kaya ku ta pasa dilanti di hòspital ku mas frekuensia. E remarkanan ta indiká ku aparte di djadumingu i djaluna mainta ku algun kaya tabata sera den sentro di suidat, hopi hende no ta tene kuenta ku nan ta dilanti di un hòspital. Ku regularidat outo ta pasa ku velosidat haltu. Ta bon pa outomobilistanan tene kuenta ku den área di un hòspital, mayoria bia ku un persona ta na hòspital, ta pa motibu ku e no ta stabil. Esei ta nifiká ku hopi bia e persona no por move rápido. Entre otro pa e krusa kaya e ta tuma poko mas tempu ku un persona stabil. Lógikamente si ta trata di un persona di edat avansá, e tambe no ta kana rápido, entre otro momentu e ta krusa kaya. Esaki no ta tuma lugá solamente pa motibu ku e área di Playa tabata será i ku outomobilistanan mester a hasi uzo di e kaya dilanti di hòspital, sinembargo esaki ta sosodé mas biaha. Tur dia outomobilistanan ta kore ku velosidat haltu i no tin ningun bòrchi pa indiká velosidat máksimo òf ku bo ta den serkania di hòspital i ku por tin hende i mucha ta krusa kaya. Gobièrnu mester buska solushon pa e situashon butando drèmpel. Tambe mester drecha e infrastruktura dilanti hòspital. E kaya di betòn ta den mal estado ku buraku i ora áwaseru kai no ta di papia mes. bo no por bishitá hòspital na pia. Ta importante pa nos ta konsiente i baha velosidat den e área ariba menshoná, evitá ku algu ta bai hopi robes, si un shofur pèrdè kòntròl debí na velosidat haltu inesesario den bisendario di hòspital.   

Share This
error: Content is protected !!