KRALENDIJK – Un dòkter manera Michael Hermelijn, nos no ta kere ta bin un otro pa igual’é na Boneiru.       

Suidadano Ewald Abdul huntu ku Dufi Martijn, a papia tokante e motibu e ku nan ta di bishita na radio, relashoná ku loke un matutinu Boneriano i dòkter Willem Cicilia a bisa tokante nan preposishon. E propishon ta pa duna e Kaya awor yamá ‘Kaminda Djabou’, kambi’é pa nòmber di ‘Dòkter Micheal Hermelijn Boulevart’, kende a fayesé resientemente. E motibu ku esnan ariba menshoná ta kontra esaki; debí ku tin mas persona, tambe importante ku ya a fayesé ku tin prioridat pa bin na remarke. “Mi ta respetá nan opinion i ta deseá pa duna un splika shon di nos deseo”, Ewald Abdul a bisa. Miéntras tantu a entregá un karta ku e petishon i nan a konfirmá ku esnan konserní a risibí e karta. Nan deseo ta si e kaya no por kambia for di ‘Kaminda Djabou’, pa hasié ‘Kaminda Djabou – Dòkter Michael Hermelijn.   

E motibu 

“E motibu ku nos ta haña pa e bira na nòmber di dòkter †Michael Hermelijn ta; for di 2007 e ta remplasá otro dòkternan na Boneiru. Na 2013 tabatin un akshon pasífiko di firmamentu pa e haña su pèrmit pa dòkter di kas na Boneiru loke el a logra tambe. Dòkter Hermelijn a atendé ku hende na ‘Huisartsenpost’. El a yuda dòkter van der Vaart pa loke ta trata atendé ku e tanki di preshon. Na 2014 dòkter Hermelijn i 2 otro persona a lanta un fundashon ‘Fundashon tur man huntu’ ku e meta pa yuda tur hende na Boneiru den sierto nesesidat. Ku esaki dòkter Hermelijn a pone su kas disponibel pa atendé ku ayudo pa e hendenan. Semper el a sali na defensa pa sali dilanti pa e komunidat. E tabata bon ku su koleganan, sinembargo e so tabata sali dilanti pa e lucha. Semper tabata e so, sin sosten di e otro dòkternan. Dòkter Hermelijn tabata bai na kunuku di hende pa duna ayudo. Nos ta konsider’é, é dòkter di pueblo. Nos a pensa riba e ‘kaminda Djabou’, esaki debí ku e no ta bisa nada di un otro persona. Pues por pone nòmber di dòkter Michael Hermelijn sin kousa deskriminashon di un otro persona. E echo ku esnan ariba menshoná ta bisa ku tin otro persona ku a hasi hopi pa Boneiru i mester bin na remarke promé ku dòkter Michael Hermelijn no ta nifiká nada. Dikon; pasobra e tempu ku esnan otro a hasi kos, i komunidat ta deseá pa pone nan dilanti, ta e hendenan di e tempu aña mester a hasi esfuerso pa e a bira realidat. No ta nos falta ku e no a sosodé.”  

Hermelijn no ta Boneriano 

“Kisas debí ku e ta un persona ku no ta nasé na Boneiru, no ta mira e motibu pa hasi loke nos ta pidi gobièrnu. Nos ta deseá pa nòmber di dòkter keda den memoria di pueblo di Boneiru. Hopi hende a keda tristu ku fayesementu di dòkter Hermelijn. Nos por a papia ku diputado dirèkt tokante nombramentu di un kaya pa e dòkter menshoná. Awendia  kosnan ta funshoná otro for di pasado, pa e motibu aki nos a hasi tur kos via e kaminda apropiá pa e bira un realidat. E meta ta pa inougurá e nòmber di Dòkter Michael Hermelijn, dia e rotònde na altura di ‘kaminda Djabou’ ta kla. Por lo pronto no ta bai tin un dòkter manera dòkter Michael Hermelijn na Boneiru. Un dòkter ku a lucha ku amor pa un pueblo, den diferente sektor. Esaki Ewald Abul huntu ku Dufi Martijn a bisa.      

Share This
error: Content is protected !!