KRALENDIJK – Ban motivá muchanan pa no bai skol ku tas riba lomba, i uza tas di hala riba wil. Ta bon pa informá e peliger òf konsekuensianan fastioso ku por ta kousá debí na karga tas di skol riba lomba òf un banda di skouder.  Un persona momentu e ta mucha di edat 10 pa 20 aña, su wesu i struktura di kurpa ta den desaroyo di formashon. Kualke moveshon òf ehersisio inkorekto, por tin konsekuensia pe den futuro. Ehèmpel: Si e hisa algu i no ta den e posishon korekto pa hasié, e ta desposishona entre otro su wesu di lomba, loke despues ta kous’é hopi doló. Kisas momentu ku e ta yòn e no ta sinti niun doló, sinembargo momentu e subi 40 pa 50 aña e problema nan ta presentá, loke tin bia ta insoportabel. Ta importante kon un hende ta para, move, drumi i sinta. 

TAS DI SKOL RIBA LOMBA 

Estudionan hasí ta demostrá ku un persona momentu ku su kurpa ainda ta den desaroyo (formashon di wesu i struktura di kurpa), ta momentu e ta bai skol. E mucha òf hóben ta karga un tas hopi pisá ku material di skol, loke e mester hasi.    

Ta notabel tambe kon muchanan ta bai skol ku tas hopi pisa debí na kantidat di material (buki) ku mester pa skol. Esaki por tin konsekuensia serio pa desaroyo di e mucha su lomba (su formashon). Meskos si e karg’é riba un banda di skouder. Esaki ta sosodé na Boneiru, kaminda muchanan ta karga tas hopi pisá riba lomba òf un banda di skouder. Ta bon pa entre otro direktor di skol, kuminsá motivá i konsientisá muchanan pa usa tas pa bai skol, esun di hala riba wil. E ta fásil pa ranka i no tin niun peso riba e kurpa di hende. Tambe un dosente ku ta duna lès di biologia, ta rekonosé e situashon ya menshoná i por duna su rekomendashon. Esaki ta spesialmente muchanan ku ta bai skol sekundario. Na Kòrsou por komprondé ku tin un skol ku ta eksihí pa usa tas di hala. Kisas Liseo Boneriano, ku ta e skol ku muchanan ta bai i tin hopi material pa move kuné pa medio di tas, pa konsientisá nan e benefisio pa uso di tas pa hala i no esun di riba lomba. 

Share This
error: Content is protected !!