KRALENDIJK – E siman aki a tuma lugá e ‘Global Entrepreneurship Week’. Djaluna na inisio di e ‘Global Entrepreneurship Week’, a inisiá ku e proyekto piloto di ‘KvK Academy’. Diputado Elvis Tjin Asjoe tabata presente i entre otro el a elaborá riba algun punto, pa ilustrá kon importante ta e asina yama; skol pa hasi negoshi. “Hopi importante e proyekto di ‘KvK Academy’ta, kaminda negoshantenan por haña un preparashon amplio kon hasi negoshi. Mi a pasa den e proseso kaminda mi mes tabatin negoshi pues mi tin eksperensia. Bo por ta bon karpinté òf tin kualke otro don i por dominá un fishi hopi bon. Esei no ta nifiká ku bo ta bon negoshante. Bo mester di e preparashon kon atendé ku e parti finansiero, momentu bo ta bai hasi negoshi ku e don (komo bon karpinté) ku bo tin. Hopi bia e hende ta kuminsá un negoshi i mira hopi sèn a drenta, i ta hasi mal uso di esaki. Na final di aña momentu ku hasi kuenta anual, e ta ripara ku ta sèn di e nogoshi el a gasta, loke ta kousa problema finansiero pa kontinuashon di e negoshi.  Poulatinamente bo mes ta destruí e negoshi. Pa e motibu aki ta hopi importante pa un persona ku ta deseá pa lanta un negoshi, pa siña e kosnan básiko di un negoshi, pa e no destruí loke e tin talento pe, debí na falta di sierto konosementu, ku ta rekerí pa lanta un negoshi. Ta hopi importante pa siña kon atendé ku e parti finansiero. Sigur un tremendo programa ku Kámara di Komersio a inisiá i éksito pa esnan ku ta sigui e guia”, diputado Elvis Tjin Asjoe a bisa.       

Share This
error: Content is protected !!