KRALENDIJK–E torneo di futbòl pa kalentá i prepará pa kampionato ku ta kuminsá 17 yanüari 2021, ta kuminsá djárason otro siman 25 novèmber 2020, definitivamente sin públiko.

Lo hunga den Stadion Kralendijk ku ta stadion di Playa.
E weganan ta bai via e sistema di “Live streaming” pa e fanatikada ku deseá esei lo por sigui esakinan.

Esaki nos por a komprondé di e kordinadó di torneonan i kampionatonan di futbòl pa FFB ku ta sr Patrick Mariana. Sr. Mariana riba nos pregunta a duna esaki di konosé na nos Ibi Piar di e Programa Deportivo Deporte99 e siman aki.

E preparashonnan pa e torneo pa kalentá ta tumando lugá i práktikamente kla ku tur kos pa e torneo kuminsá djárason otro siman 25 novèmber den Stadion di Playa den oranan di anochi.

E promé partido di e torneo ta entre e ekiponan Atlétiko Flamingo di Nikiboko i Real Rincon di Rincon ku ta e kampionnan.

E di dos partido di e torneo djaweps 26 novèmber 2020, ta hunga kontra otro e ekiponan Juventus di Antriòl/Playa Pabou i Vespo di Rincon.

Djabièrnè 27 novèmber 2020 e di tres partido ku ta entre e ekiponan Uruguay di Anttriòl Pariba i Estrellas di Nort Saliña.
E torneo aki pa kalentá ta finalisá dia 20 di desèmber 2020.
Despues di esaki no tin futbòl mas pa e aña aki, ta tuma e pouze kustumbrá di fin di aña pa despues kuminsá ku kampionato na yanüari 2021.

E kampionato ta kuminsá dia 17 di yanüari 2021, di kua lo hunga 1 buèlta di 6, buèlta di 4 i final di e kampionato ku ta dia 2 di yüli 2021.

Mui probabel despues di torneo pa kalentá, lo evaluá i mira kon ta hunga e kampionato ofisial ku ta kuminsá dia 17 di yanüari 2021, si e kampionato tambe ta bai sin públiko o nò.

Éksito na e ekiponan den e torneo pa kalentá, preparando pa kampionato di futbòl di nos isla ku ta kuminsá den luna di yanüari 2021.

Share This
error: Content is protected !!