BONAIRE FUTSAL FEDERATION ‘BFF’ FUNDÁ 9 ÒKTOBER 2020

KRALENDIJK – Boneiru tin su federashon di futsal ku a keda fundá luna pasá.

Federashon Futsal Boneiru BFF ku ta Bonaire Futsal Federation, a keda fundá ofisialmente dia 9 di òktober 2020, esaki ku presidente sr. Bernoullis Ranis huntu ku su otro miembronan di direktiva di e federashon.

E federashon tin su statuto i su miembronan di direktiva ku ta karga e federashon aki. Meta ta pa promové e deporte di futsal den su totalidat riba nos isla, tambe pafó di nos isla.

Mui pronto lo trata na logra yega i organisá e klupnan di futsal di Boneiru pa nan forma parti di federashon komo miembro ofisial.

Pa yuda e federashon ku esakinan, fin di siman pasá tabata di bishita na Boneiru, e presidente di CONCAC ku ta e federashon di futsal di Norte Amerika, Sentro Amerika i Karibe, e boneriano bibá na Kòrsou, ku ta sr. Wilfrido Coffi.

Sr. Wilfrido Coffi bibá na Kòrsou, ta tambe e sekretario di e federashon mundial di futsal, tambe presidente di e federashon di futsal di Kòrsou.

E tabata na Boneiru riba invitashon di e direktiva di BFF pa yuda ku informashonnan i guia na e direktiva nobo aki den futsal ku tur loke ta regardá funshonamentu di e federashon mas mihó i mas òptimal posibel.

Sr. Coffi lo sostené e direktiva di e federashon nobo aki di Boneiru ku tur e informashonnan i guia nesesario pa e federashon lanta para riba su pianan.

E federashon tin un direktiva dinámiko ku hendenan ku ya a yega di traha den federashonnan i hasi esaki na satisfakshon tambe ku éskito.

Nan tabata tambe deportistanan ku konosé loke ta deporte i tambe futsal, pa por hiba un bon maneho den e federashon. Durante sr. Coffi su bishita fin di siman pasá, nan tabatin diferente reunionnan, diferente enkuentronan, pero tambe a bai fèlt pa pasa den e reglanan i laga e miembronan di e direktiva di BFF, sera konosí mas mihó i di aserka ku e reglanan di futsal.

Notaris mr. Kenneth F. Arends, a instalá e direktiva.

Direktiva.

Bernoullis Ranis Presidente.
Hans Els Visepresidente.
Jarmilla Roosje tesorero.
Magnus Piar jr. sekretario.
Nymphette Josephia miembro.
Mickey Winklaar miembro.
Maudimar Quandus miembro.

Tur esnan den e direktiva ta hopi entusiasma ku e federashon i tei traha pa logra e meta ku ke logra ku e deporte di futsal aki na Boneiru.
Riba potrèt por mira algun miembro di direktiva di BFF ku ta para pa Bonaire Futsal Federation.

Share This
error: Content is protected !!