KRALENDIJK – Delno Tromp bou di e nòmber ‘Denchi’, ta ofrese na e pueblo di Boneiru un eksposishon di arte titulá, Koonookoo Life & More. A skohe e biaha aki pa tene e eksposishon pa un periodo di 2 luna for di 21 di novèmber 2020 pa 16 di yanüari 2021 entre 12’or di mèrdia pa 6’or di atardi, di djaluna pa djasabra.

Ta organisá e aktividat durante un temporada largu (8 siman), esaki pa evitá ku hopi hende ta presentá na mes momentu. Por tin solamente 20 hende den e edifisio. Ta importante pa tene kuenta ku e medidanan di último tempu, relashoná ku e pandemia di Corona vírùs.

Den e eksposishon aki Delno Tromp ta trese diferente arte dilanti i e parti ku sigur lo bai resaltá ta kolonan bibu ku e ta usa. Arte, obra di man i potrèt pa asina bende nan i rekoudá fondo. Esaki ta e di dos eksposishon di arte ku Delno ta presentá, e otro tabata aña pasá i ku a haña hopi bishitante. E fondo ku a generá e tempu ei tambe a bai pa un bon kousa.

E biaha aki a skohe Prinses Wilhelmina Fonds Bonaire, organisashon ku su meta prinsipal ta konsientisá e pueblo kon pa kuida bo salú kontra e malesa di kanser. Tambe e fundashon ta yuda esnan den nesesidat ku ta sufri di e malesa di kanser. E ganashi generá di e obranan ta bai komo donashon pa e fundashon.

Por bishitá e sitio di eksposishon di djaluna pa djasabra 12or di mèrdia pa 6or di atardi. E lugá ta situá den un di e lokalnan di e sentro komersial na waf Nello Craane (Waf di sùit).

‘Prinses Wilhelmina Fonds’ ta hopi kontentu ku Delno Tromp, loke e ta hasi pa generá fondo pa e fundashon. Delno ta satisfecho i kontentu ku e por organisá esaki pa un bon kousa i ta gradisí esnan ku a duna un man pa realisá e proyekto. Un danki spesial na Deepak Daryanani, kende ta un di e spònsernan di e eksposishon di arte; ‘Koonookoo Life & More’.

Share This
error: Content is protected !!