KRALENDIJK – E federashon di futbòl di nos isla ku ta FFB bou di presidensia di sr. Ludwig “Luti” Balentin, djabièrnè último den oranan di atardi, den sala di konferensia di Hotel Habitat, a presentá e kuerpo tékniko nobo di FFB na prensa.

Na e okashon aki a habri e atardi di e enkuentro, e presidente di FFB ku ta sr. Luti Balentin, ku a presentá e kuerpo tékniko i tambe sr. Silvio “Chio” Semeleer ku ta e kordinadó tékniko di henter e selekshon, tantu “coach”nan komo tambe e hungadónan den e selekshon. Despues di a keda presentá pa sr. Balentin ofisialmente komo e DT na kabes di e kuerpo tékniko di tres “coach”, a hiba palabra sr. Mauricio Tobon ku ta na kabes di e kuerpo tékniko.

Sr. Tobon a splika kon a yega na forma e selekshon di 25 hungadó pa e selekshon, esaki meskos ku ta sosodé rònt mundu. Tin 25 hungadó i segun treinennan ta bai, lo por mira kambio den e hungadónan den selekshon.
Tambe hiba palabra sr. Silvio “Chio” Semeleer ku ta e kordinadó tékniko na kabes di henter e selekshon i su “coach”nan.

Despues di sr. Tobon, segun sr. Semeleer a duna di konosé, ta sigui e di dos “coach” den e kuerpo tékniko ta sr. Shahairo Oleana i di tres “coach”ta Xedro Wever. E anochi aki tabata presente tambe e dos instruktornan pa e lisensianan di Concacaf pa e klupnan, sr. Ryan Martha i sr. Naftaly Rier.

Awendia no ta gewon asina ta nombra un “coach” komo DT di un selekshon. Mester ta “coach”nan lisensiá pa Concacaf pa por fungi komo tal. Mester tin e lisensianan sino no por ta “coach”di un selekshon.

Pa loke ta formamentu dje selekshon aki, esaki a keda formá pa e invitashon di Kòrsou ku selebrashon di 100 aña di e federashon di Kòrsou, ku lo tuma lugá den luna di febrüari.

E selekshon aki pa e kompromiso riba invitashon di e federashon di Kòrsou, lo keda tambe e selekshon pa entre otro weganan di Concacaf i otro kompromisonan. Ku esaki ta evitá manera tabata e kaso ántes, ku den purá ta kore forma un selekshon, momentu ku kualke kompromiso presentá den representashon di nos isla.

Awó e selekshon tei kaba i ta sigui prepará pa kualke kompromiso ku presentá i ku tin ku kumpli kuné den representashon di nos isla. Tambe t’asina ku opshon kuminsando otro aña, lo bai yama i trese nos hungadónan pafó di Boneiru, entre otro na Hulanda, pa forma parti di nos selekshon pa kualke kompromiso ku e selekshon tin ku kumpli kuné den representashon di nos isla sea aki na kas mes o pafó di kas.

Riba potrèt e enkuentro djabièrnè último pa duna informashon na prensa pa loke ta e kuerpo tékniko di selekshon di futbòl di nos isla.

Share This
error: Content is protected !!