KRALENDIJK – Un polítiko konservativo di Inglatera a yega di bisa: “Tur karera polítiko ta kaba ku un frakaso, pasobra esaki ta inherente na polítika i hende” Parti di e relato di investigashon relashoná ku BHM a konkluí ku diputado James Kroon den e asuntu di lus pa stadionnan di Playa i Rinkon no a aktua transparente, konfiabel ni kuidadoso.

Ta puntonan di kòntròl poné den e aklarashon di e kódigo di komportashon di diputado. Transparente riba tereno polítiko ta nifiká kon habrí e mandatario ta den su maneho. No mag hasi kos skondí skondí. Diputado Kroon no tabata habrí ku presidente di Federashon di Futbol Boneriano FFB, Luti Balentin ku ta alabes presidente di UPB di kua partido diputado Kroon ta miembro. Konfiabilidat ta nifiká kere ku un persona ta honesto. Diputado Kroon no tabata honesto ku representante di Unique Lights. Diputado a sigurá ku ta paga pa e lusnan pero ainda no a kumpli. Aktua ku koutela ta nifiká; pèrkurá pa kumpli ku loke a palabrá. Diputado Kroon no a kumpli ni ku e palabrashonnan ku presidente di FFB ni ku representante di Unique Lights. Kiko Gezaghèber presidente di Kolegio Ehekutivo i protektor di integridat a hasi. Ta bèrdat ku, riba pregunta di konsehal Abraham, Gezaghèber a papia ku diputado Kroon i bis’e pa keda trankil.

Ta imposibel ku no a mustra diputado Kroon ku e mester saka su konklushon. Den un kombersashon asina bida di e koalishon MPB/UPB mester tabata na peliger. A skohe na mi opinion konsientemente pa laga Konseho Insular tuma desishon. Esaki ta nifiká ku partidonan den koalishon lo no bini ku un moshon di deskonfiansa ni forma un mayoria pa un moshon di tal índole. Kiko awor?. Gezaghèber, komo protektor di integridat, no tin otro opshon ku no ta di bisa diputado Kroon tuma retiro. Partido UPB tin ku asumí su responsabilidat, komo ku su diputado no tabata honesto ku presidente di partido. Frakshon di UPB no por asumí e posishon di aseptá ku diputado ta robes, pero ta keda ku konfiansa den e diputado. Konfiansa ta enserá kumpli ku reglanan di Bon Gobernashon. Ta probá ku diputado Kroon no a kumpli ku e reglanan aki. Konklushon ta ku mester remplasá diputado Kroon. Pueblo mester tin konfiansa ku su representante i mandatarionan ta honesto, konsistente, konfiabel i kuidadoso”, Sealy ta konklui.

Share This
error: Content is protected !!