KRALENDIJK – Fin di siman tras di lomba e Bonaire Futsal Federation (BFF) a hasi paseo na diferente sitio na Boneiru, tuma nota di fasilidatnan ku tin pa práktika futbòl di sala. Ta trata di un fundashon resien nasé, ku e meta pa praktiká entre otro e deporte ku futbòl di sala. E fundashon huntu ku Wilfrido Coffi, Presidente di CONCAC Futsal Confederashon Norte, Sentral i Karibe, tambe Sekretario General xi AMF Asosashon Mundial di FutSal, tabata presente algun dia na Boneiru. Final di e dia e miembronan a sinta un momentu na Posada Para Mira, i a kontinuá ku kombersashon relashoná ku futbòl di sala. Na e okashon diputado James Kroon tabata presente i a papia ku e invitado Wilfrido Coffi, kende a bin for di eksterior pa duna un man na BFF.      

Entre otro a trese dilanti ku e meta di e federashon ta pa weganan tuma lugá na Boneiru i internashonal. Pa e motibu a trese Wilfrido Coffi na Boneiru, kende tin eksperensia amplio den e deporte. Esaki ta amplia mas posibilidat pa otro rango di deporte riba nos isla. Tin ya diferente fasilidat pa por organisá weganan di futbòl di sala na Boneiru. Pues no ta nesesario konstruí un sitio spesial pa kuminsá ku e práktikanan. Diputado a menshoná ku tin diferente desaroyo tumando lugá pa loke ta trata fasilidat di deporte en general na Boneiru.   

Tin diferente rango di deporte aktivo i un mas sigur ta bon bini. Awor pa dilanti nos sa di BFF, i por kontribuí ku loke ta na alkanse di gobièrnu, pa adelanto di e deporte menshoná. Bernoullis Ranis ta presidente di Fundashon BFF, i huntu ku diputado i e invitado Wilfrido Coffi, a papia riba diferente aspekto durante e enkuentro na Posada Para Mira.

Share This
error: Content is protected !!