KRALENDIJK – Ku pena na nos kurason nos a tuma nota di un karta di CFT data 18 di novèmber último na Presidente di Kolegio Ehekutivo kaminda a informá Kolegio Ehekutivo ku CFT, den ehekushon di stipulashonnan di FINBES, praktikamente ta bai proponé na Sekretario di Estado pa pone Gobièrnu di Bonaire bou di kuratela finansiero pa motibu di no kumpli ku lei Finansiero vigente i stipulashon básiko di un maneho finansiero responsabel.

Esaki a konsekuensia ku apesar ku Lei finansiero [FINBES] ta stipulá ku promé ku 1 di sèptèmber di kada aña, Kolegio Ehekutivo mester ofresé un konsepto presupuesto pa Gobièrnu di Bonaire pa e aña siguiente, Konseho Insular a risibí un konsepto presupuesto ku un tardansa inmenso riba 27 di òktober último. Teniendo na kuenta ku mester publiká esaki dos siman promé ku por trat’e den Konseho, no por a trata esaki promé ku 11 di novèmber ku konsekuensia ku outomátikamente no por kumpli ku e ultimatum di 15 di novèmber pa Kolegio Ehekutivo ofresé un Presupuesto 2021, stipulá pa Konseho Insular, na Sekretario di Estado di Relashon den Reino.

Pa agregá riba esaki, djabièrnè 20 di novèmber último Konseho Insular a tuma nota di un karta di sekretario di Estado Knops na bo persona ku ta sekundá e posishon ya indiká pa CFT sitando ku ta lamentabel ku no a risibí un presupuesto di Gobièrnu di Bonaire stipulá promé ku 15 di novèmber manera preskribí pa Lei Finansiero [FINBES], i ta indiká ku e ta pidi CFT pa manda un konsepto presupuesto pa Bonaire ku su persona lo konsiderá esaki i si nesesario stipul’é.

Pa korona e obra, riba mesun 20 di novèmber último, na nòmber di presidentenan di komishonnan fiho di Konseho Insular, Presidente di komishon B&O Sr. Joselito Statia, a kanselá definitivamente reunion di komishon pa trata konsepto di presupuesto di Gobièrnu di Bonaire pa 2021.

Esaki ta un akshon insolito i iresponsabel tumando nota ku WOLBES ta stipulá ku e akto di keda sin trata un presupuesto den Konseho Insular por wòrdu konsiderá komo negligensia grave di responsabilidat di Gobernashon (Párafo 2.1.2. Bevoegdheden van het eilandsbestuur, Memorie van Toelichting WOLBES), kual ta e mesun argumento ku a usa pa usurpa mandato gubernamental na Statia, ku por tin komo konsekuensia ku ta pone Bonaire bou di un kuratela total.

P’e motibu ei nos frakshonnan a hasi un petishon pa un reunion URGENTE di Komishon fiho pa Konseho Insular, manera ya tabata planifiká, por trata e konsepto di Presupuesto 2021 konforme responsabilidat di Konseho Insular.

Fuera ku e proseso pa trata i stipulá un presupuesto konforme nos petishon mester sigui kana su kaminda den reunionnan di komishon, Konseho Insular no por keda sin trata e situashon gubernamental ku a surgi pa e negligensia grave aki di Kolegio Ehekutivo.

Kon por a yega asina leu ku nos maneho finansiero ta den un situashon tan deplorabel ku Kolegio Ehekutivo no por ofresé un presupuesto na tempu na Konseho Insular? Kon por ta posibel ku pa negligensia òf inkapasidat Kolegio Ehekutivo ta pone Bonaire den peliger di un kuratela finansiero?

Nos pueblo eifó ta den nesesidatnan grandi ku mester di maneho efikas i desidido. Mester di akshon i maneho klave pa salbaguardiá nos ekonomia i asina duna un alivio na nos pueblo, ehekushon urgente pa mehora situashon di nos infrastruktura ku a yega un situashon deplorabel nunka bisto, akshon urgente pa maneho di pobresa pa yuda esnan ku mas a risibí sla di e situashon okashoná pa medidanan di COVID.

Bonaire ta den krísis ekonómiko, infrastruktural i sosial pero Kolegio Ehekutivo no ta ni kapas pa stipulá prioridatnan di maneho ku un presupuesto pa atendé ku e nesesidatnan aki. Kon Konseho Insular por mantené konfiansa den un kolegio asina?

E situashon ariba menshoná ta di preokupashon kritiko pa nos komunidat i Gobernashon, i mester di atenshon URGENTE den Konseho Insular.

P’e motibu ei suskrito, konforme artíkulo 18 insiso 2 di wolBESi i artíkulo 13 insiso 1 di Reglamentu di Órden, ta hasi petishon pa un reunion èkstra ordinarioii URGENTE ku e siguiente puntonan di agènda:

1) Mal maneho finansiero di parti Kolegio Ehekutivo;

Pa ku e reunion aki nos kier supliká e siguiente invitadonan i dokumento:

Invitado

  1. Kolegio Ehekutivo;
  2. Gezaghebber;

Konforme nos Reglamentu di Órden, demas stipulashon ta na vigor pa reunion nan Èkstra Ordinarioiii. Pa e motibu ei nos nos ta en espera pa un yamada dentro di shete diaiv pa un reunion Públiko di Forma Opinion di karakter di URGENSIA riba djaweps 26 di novèmber , 19:00 den sala di reunion den Passangrahan.v

En espera di e konvokashon i dokumento rekerí nos ta mantené.

Clark Abraham – Frakshon Demokrat / Desiree Coffie – Frakshon Coffie

Share This
error: Content is protected !!