KRALENDIJK – Notisia Live99FM tin konfirmashon ku despues di reunionnan maratóniko ayera nochi ku direktiva di Partido MPB, pa motibunan personal awe djaweps mainta diputado Elvis Tjin Asjoe a entregá su karta di retiru na gezaghèber di Boneiru sr. Edison Rijna. Tanten el lo wòrdu remplasá pa Diputado Nina den Heyer.
Probablemente Tjin Asjoe ta bai drenta Konseho Insular bèk komo miembro. Tin indikashon ku ta pa un temporada i despues e ta regresá e posishon komo diputado. Ainda no ta konosí ken partido MPB lo bai nombra na su lugá komo diputado.

Tjin Asjoe: “Ta bèrdat mi a entrega karta di retiru, esaki debí na e problemanan ku mi tin, pa loke tabata trata kosnan personal ku ya ta den publisidat. Di e manera aki mi tin mas tempu pa dediká na mi asuntunan personal ku mas trankilidat. Nos partido ta para stabilidat. Nos a papia den seno di partido i mi ta sali algun luna i despues regresá komo diputado. Mi ke drenta Konseho Insular pa duna un man pa mihó gobernashon i stabilidat den Konseho Insular. Kos nan ta kana bon, i kada 9 miembro ta hasi nan trabou.  

Pa loke ta trata e asuntu di ‘Change Team’; no tin nada di aber ku mi desishon pa retirá temporalmente komo diputado. Nos a bin ku un persona i e no a resultá pa atendé ku loke mester a hasi, i awor tin 6 persona i kosnan ta kana bon. Presupuesto ya ta kla no tin nada di aber ku e ‘Change Team’. Mi sa sigur ku e tim di 6 persona, ku ta e mes un tim ku a yuda Saba, ta bai kontribuí bon serka nos.  Mi ta retirá i nos ta bai papia den seno ken ta okupá mi posishon i sali for di konseho insular. Ta atendé ku koutela pa pone hende den e posishonnan. Sigur mester den e situashon aktual, un hende kla pa kontinuá i no tin espasio pa kalentá. MPB tin un bon relashon di union ku partido polítiko UPB, loke ta dunando hopi bon resultado na bienestar di e isla di Boneiru. Mi ta keda guia den koalishon i Konseho Insular i partido. Hulanda ta na altura di e desishon ku mi a tuma. Mi ke atendé mi kosnan  personal i duna oportunidat pa otronan karga responsabilidat”, Tjin Asjoe a bisa.   

Fuente: AIMED AYUBI.

NOTISIA KU BO POR KONFIA

Share This
error: Content is protected !!