KRALENDIJK Radio Live 99.9FM tin informashon ku den seno di gobièrnu di boneiru, tin tenshon, diskushon i pleitu bou di diputadonan. Ta trata di diskushonnan ku sierto momentu ta di atenshon. E diskushon ta entre e diputado ku awe mainta a entregá su karta di retiru Elvis Tjin Asjoe ku ta alabes lider di partido MPB i diputado Nina den Heyer ku ta e ‘vote-getter’ di e partido menshoná pero tambe di henter elekshon pasá. Esaki tin di aber ku un petishon eksterno ku diputado den Heyer ta deseá pa loke ta trata investigashon den e asuntu di integridat di Bonaire Holding Maatschaapij (BHM). E situashon nan a presentá, debí ku diputado Elvis Tjin Asjoe ta konfrontá problema ku asuntunan personal, i no ta ful aktivo. Esaki tabatin konsekuensia tambe ku el a faya ku e prosedura pa traha presupuesto i entregá esaki na tempu na Konseho Insular. Pa kolmo ora entregá mes no ta entregá esaki kompleto i ta falta yen di dokumento ku tambe ta stroba e proseso.

Ta konosí pa tur hende, resientemente a presentá un problema entre partido MPB i Daisy Coffie, i a yega asina leu ku a bin separashon entre esnan menshoná. Daisy Coffie a alehá su mes for di partido MPB, despues ku a pidié pa e retirá komo lider di frakshon. E no tabata kontentu ku e proposishon i a reakshona otro, kibra ku MPB i bira miembro di Konseho Insular independiente. Otro situashon ku ta sirkulá, ku diputado James Kroon di partido UPB, ku ta partner di koalishon den gobernashon ku MPB, tin momentunan ku kos no a kana manera mester ta i fuera di tur regla di bon gobernashon. Kos no tabata masha di kanta makamba, manera ta bisa. Tin indikashon ku e diputado ku último elekshon haña mas voto ku tur otro, Nina den Heyer, no ta masha kontentu tampoko ku diputado James Kroon. Parse ta entre otro debí na e problema tokante transparensia i kumpramentu di lus pa Stadion di Rincon i Playa ku tampoko a kana segun prosedura.

Nina ta un persona fuerte di karakter i no ta laga kosnan ku no ta korekto pasa bou di su wowo sin mas. Pues ta saliendo na kla ku na nivel di gobernashon tambe tin frikshon i asta tenshon. 

Share This
error: Content is protected !!