ORANJESTAD – Cortamento den salario di 12.,6% ta continua den 2021 por lo pronto, mescos cu den 2020.

Minister President Evelyn Wever-Croes hunto cu Ministernan Andin Bikker, Rudy Lampe y Glenbert Croes a reuni cu representantenan SADA, SEPA, SADA, TOPA y SIMAR.

Durante e reunion a toca varios tema di importancia pa e empleado publico.

Cortamento di salario cu 12.6%:

Minister President a indica cu basa riba e palabracionnan cu Hulanda, e cortamento di salario lo ta “te proximo aviso”, ‘ tot nadere orde’. Gobierno di Aruba ta depende awor di financiamento di Hulanda, y esaki ta un di e condicionnan pa e fiansanan. Tanten cu Aruba ta keda depende di presta placa na Hulanda, mester cumpli cu e condicionnan. A palabra cu lo sigui na mesa cu sindicatonan pa tene sindicato na altura di e desaroyonan. Minister President a indica cu no ta kere cu lo tin mas cortamento den salario, pues no mas cu e 12.6%.

Condicionnan di Hulanda, landspakket:

Gobernantenan a duna informacion riba e condicionnan cu Hulanda, y a contesta hopi pregunta di sindicatonan riba e landspakket. Varios di e temanan ainda mester wordo aclarea pa Hulanda, y Gobierno a compromete di lo keda den contacto cu sindicato pa duna mas informacion asina cu e informacion ta disponible.

Atraso den promocionnan di empleadonan publico:

Sindicatonan a indica cu lo kier delibera cu Gobierno riba promocionnan di empleadonan cu ta wardando pa un tempo caba. Minister President a splica cu debi na e pandemia, mester a pone prioridadnan otro caminda, pero awor cu e pandemia ta bastante bou control, lo pone prioridad na e promocionnan. Riba e tema aki tambe Gobierno lo sigui den deliberacion cu sindicatonan.

“Den nomber di Gobierno di Aruba, mi ta gradici sindicatonan pa nan comprension y cooperacion den e periodo dificil cu nos tin tras di lomba, y cu ainda nos ta aden. Gobierno ta haciendo su maximo esfuerso pa reconstrui nos pais economicamente, pa Aruba por sali di e pandemia aki mas fuerte, cu un economia mas fuerte y cu un autonomia mas fuerte”, Minister President Evelyn Wever-Croes a expresa.

Share This
error: Content is protected !!