TRES DETENSHON I 1 ARMA DI KANDELA KONFISKÁ

KRALENDIJK – Awe djasabra alrededor di 3:30 di mardugá a drenta keho di un hòmber ku lo a menasá un persona ku arma di kandela. Mesora polis a bai na e sitio indiká den búskeda di e sospechoso. Na yegada di polis tabata tin diferente hende presente ku a trata na stroba trabou di polis.

Durante ku outoridatnan a bai pa detené e sospechoso ku lo mester a menasá un otro ku arma di kandela, esnan presente a purba stroba e trabou di polis. No a keda e agentenan polisial nada otro di lòs diferente tiru di atvertensia i a detené personanan ku no kier a respetá òrdu di polis.

Tanten ku polis tabata realisá e diferente detenshonnan, un otro sospechoso a trata di hui bai ku e outo di e sospechoso primordial. Polisnan atento na e sitio a tuma nota di esaki i a persiguié e outo aki mesora i a logra konfiská e vehíkulo i detené e hòmber.

Na momentu ku outoridatnan a bai listra den e outo, a bin enkontrá ku un arma di kandela. Kontinuando ku e investigashon agentenan polisial a kontinuá ku un búskeda na un kas den bario di Tera Kòrá. Durante di e búskeda no a konfiská ningun artíkulo.

Durante di e insidente aki a detené un hòmber di inisialnan D.I.M.B di 18 aña di edat, un hòmber L.A.G.M. di 19 aña di edat i un hòmber di inisialnan S.V. di 24 aña di edat.

No ta ekskluí mas detenshon den e kaso aki.

Share This
error: Content is protected !!