KRALENDIJK – ‘Iresponsabel i un negligensia total i serio di tarea mester kalifiká e aktitut ku partidonan UPB i MPB di e aktual koalishon a tuma djaweps último ora ku nan no a presentá na e reunión tokante mal maneho finansiero. No a duna tampoko ningun argumentu ni motibu di nan ousensia. Tin un dicho ta bisa: “Bo por kore pero bo no por skonde”.  Grasias na Dios ku nos leinan mes ta pone ku maske kuantu e 5 miembronan Renata Domacasse, Edison Ellis, Joselito Statie, Gerald Silberie i Esther Bernabela kore, nan lo no por skonde e bèrdat ku ta presentá nan dilanti. Anto e bèrdat lo presentá djarason awor, ora ku gezaghèber bolbe habri e reunion. E ora ei tantu bal ku nan t’ei òf laga di t’ei, e reunión lo kontinuá i lo tuma desishonnan legal i bálido,’ asina konsehal Daisy Coffie ta ekspresá su mes fuertemente den un komunikado pa prensa.

‘Na promé lugá nan a aseptá ku un diputado den un forma ònbeskòp i sin rèspèt pa nan ku a nombr’é ta tuma retiro mandando un karta pa gezaghèber i no pa su dunadó di trabou ku ta Konseho Insular. Ki klase di honor bo ta duna bo mes komo miembro di Konseho Insular ora un diputado ku abo a nombra no ta bin responsabilisá su mes den Konseho Insular. Den un relashon di trabou normal, un trahadó ku hasi algu asina, hasta por ser poné responsabel pa dañonan ku e ta kousa na un empresa pa motibu di e aktitut ei.’

Mas aleu detayadamente Diasy Coffie ta splika ku diferente karta di CFT i tambe di sekretario di estado den kua nan ta deskualifiká e funshonamentu di diputado Tjin–A–Sjoe for di dia ku ela asumí e responsabilidat di finansa ta papia palabra kla i ta mustra ku no por tin ningun duda ku tin mal maneho finansiero. Kuentanan anual no ta kla, no ta nombra komisario ni direktor den e kompanianan di gobierno. No ta manda kambionan di presupuesto i ehekushon di presupuesto ta laga hopi di deseá. Kada biaha no ta uza e fondonan pa lokual nan ta destiná i kuentanan anual di e kompanianan di gobièrnu ta kore atras for di 2016. Te awe no a entregá e di tres kambio di presupuesto 2020. No tin un bista riba gastunan di personal ku ta traha pa Entidat Públiko Boneiru. No a atendé ku e 37 rekomendashonnan pa drecha e maneho finansiero. No ta raportá kon ta pará ku e plan di Ernst and Young pa fortifiká aparato públiko. E akuerdo di gobernashon firmá na novèmber 2018, esta dos aña pasá tampoko tin progreso den su ehekushon. Esakinan ta algun punto pa ilustrá kon defisiente e maneho finansiero di e diputado ku a sali na kareda tabata durante e 19 lunanan ku ela karga e responsabilidat aki. Pa koroná obra e ta entregá presupuesto di 2021 no ménos ku 8 siman lat ku e konsekuensia ku no ta representantenan di pueblo ku pueblo a  skohe ta stipulá e presupuesto di e plakanan di belasting ku pueblo a produsí, sino ta CFT ta hasi esaki.

I pa mustra kon serio e situashon aki ta Daisy Coffie ta referí na un sitado for di e karta di CFT di 17 di novèmber: ‘Bij het onvoldoende nakomen van de door BZK gestelde voorschriften ofwel bij het met onvoldoende urgentie oppakken van het plan van aanpak van EY, kan de staatssecretaris ertoe overgaan een algemene of bijzondere aanwijzing te geven (artikel 34 lid 5 Wet FinBES). Het Cft zal de staatssecretaris van BZK hiertoe indien noodzakelijk adviseren.’ I segun Daisy Coffie koalishon, esta UPB i MPB, tambe ta na altura di tur loke el a trese dilanti, pasobra nan tambe a risibí tur e kartanan.

‘Ku e kedamentu sin presentá na reunión, UPB i MPB a unifiká nan mes ku e mal maneho finansiero di nos isla. Ta nos di Konseho Insular tin e obligashon komo tarea pa kontrolá i korigí gobièrnu ora e no ta kumpli ku e prinsipionan di bon gobernashon. I laga mi ta bon kla den esaki. Kolegio ehekutivo ta un kolegio ku ta traha a base kolegial, pues gezaghèber huntu ku e tres diputadonan ta kolektivamente i individualmente responsabel pa maneho en general i den e kaso spesífiko aki e maneho finansiero. Diputado Elvis a bai sin bin responsabilisá su mes. Mi ta kere ku e dos otro diputadonan mester komprondé ku baimentu di Elvis a pone lus mas skèrpi riba nan dos, komo ko-responsabel pa e maneho finansiero pésimo ku nan tambe aparentemente a aprobá. Kiko nan ta bai hasi awor, tira falta riba diputado Elvis òf nan tambe ta konsiderá nan posishon den e aktual Kolegio Ehekutivo. Anto nos gezaghèber, e lo sali dilanti i para ko-responsabel pa e maneho aki? No lubidá ku banda ku e ta miembro di Kolegio Ehekutivo e ta wardadó di prinsipionan di bon gobernashon  i integridat di gobernashon. Ta na dje CFT i sekretario di estado a dirigí tur e kartanan ku e atvertensianan serio aki. Kiko ela hasi, ki paso i akshon ela tuma pa korigi. Lo ta bon si ela tuma paso òf akshon pa kompartí esakinan ku komunidat,’ asina sra Coffie a sigui trese padilanti.

Terminando konsehal Daisy Coffie ta puntra koalishon:‘Boso ku a kore, boso lo ta dispuesto di bin ku un moshon di aprobashon i konfiansa den diputado Elvis Tjin–A–Sjoe pa asina laga pasa ku su retiro ta pa motibunan personal ela tum’é? Boso ta dispuesto pa duna e Kolegio Ehekutivo aki un moshon di sosten pa loke a pasa riba tereno finansiero i mui en partikular e entregamentu lat di presupuesto 2021 di moda ku Konseho Insular no por a stipulá esaki na tempu?  Pa boso hasi esei tin un kondishon si, esta duna kara i no kore. Kumpli ku boso tarea di kontròl i korigí maneho i sigur korigí mal maneho. Pueblo en general, pero mui en partikular votadónan di UPB i MPB ta spera sin mas pa boso duna kuenta i rason pakiko boso no ta òf no kier kumpli ku boso tarea pa kual boso a pidi e pueblo konfiansa. I spesialmente na mi eks-koleganan di MPB, ta esaki ta e polítika nobo ku nos tur (inkluyendo ami) a kuminsá na 2015? Nò tòg?’

Share This
error: Content is protected !!