KRALENDIJK – Jeffrey Levenstone komo suidadano Boneriano ta bisa ku despues di e reunion di Konseho Insular ku a wòrdu yamá pa atendé ku e rapòrt tokante di presunto violashon di integridat den kolegio ehekutivo, mi a skucha òf wòrdu informá di diferente kombersashon ku ta ser hiba riba e tópiko aki. Dor di esaki mi ke tuma tempu i bolbe splika mi pensamentu al respekto. Mi ta hasi esaki pasobra ta kla pa tur hende ku ta trata aki di un kaso di ‘asesinato di karakter’. Manchamentu di nòmber di hende dor di krea un persepshon pafó ku un persona ta korupto, ku metanan klaramente polítiko.

Mi ke reafirmá ku e rapòrt en kuestion, no ta duna indikashon ku tabata tin algu kastigabel ku a tuma lugá. Bayendo den detaye di esaki nos mester bisa ku no tabata tin kaso di tumamentu di plaka tampoko. Pues e úniko kos ku e rapòrt ta bisa ta ku e diputado enkuestion mester ta mas kouteloso.

Ban awor pa e kaso spesífiko. Kiko a pasa. Nos tin un stadion na playa ku no ta kumpli ku reglanan establesé pa por akapará weganan di índole internashonal. Banda di esaki e braketnan ku ta karga e lusnan ta den situashon deplorabel i peligroso pa deportistanan i otro usuarionan di Stadion. Gobièrnu di Boneiru tabata na altura tambe ku tin medionan finansiero na Fundashon Wega di Number Boneiru, ku ta legalmente destiná pa invertí den infrastruktura deportivo. E úniko kos ku tabata falta ta push di parti di e aparato gubernamental pa esaki wòrdu realisá. Esaki no a tuma lugá. No opstante reunionnan i palabrashonnan hasi, e situashon a keda meskos. James Kroon komo un diputado ku ta realmente ta kana ku su pueblo, ta disidí di bula den e proseso pa pone esaki kana. No pa James Kroon ni pa James Kroon haña nada ni bou di mesa ni riba mesa pero pa kontinuidat di deporte riba nos isla. Bo por imaginábo pueblo, ku un diputado ta saka su garganta pa logra kosnan pa su pueblo i ta sali algun persona ku no ta hasi nada positivo pa e isla aki, ta sali pidi pa sakrifiká James Kroon. Pa sakrifiká e úniko diputado ku realmente ta para pa su pueblo i ku ke mira proyektonan wòrdu kristalisá pa su pueblo por ta mihó.

Laga mi sali fo’i e punto di bista ku nan no sa mihó. Manera Semper nan a sali ku meta pa bati kibra i kaba ku e polítiko mandatario. E problema ku nos ta bibando sinembargo, ta unu hopi mas grandi ku James Kroon. Gobièrnu tin un problema di ehekushon. Un problema di hasi kos, un problema pa pone resultado. Ta pa e motibu aki gobièrnu ta sobra ya pa algun aña hopi sèn riba su presupuesto. Aña pasa esaki tabata mas ku 20% di e presupuesto anual. E dikon i pakiko di e problema aki, ta basa riba e dicho na ingles ku ta bisa; “All chiefs, No Indians” kombiná ku deskonfiansa interno. Tur hende ke ta sinta den kantor ta duna opdracht, bòshi hende ku tin kos di bisa sin ku esaki ta nan tarea i ningun ku ta ehekutá pa nos por mira e resultado. Hendenan ku ta kere eróneamente ku ora e palabrashon wòrdu traha e trabou ta hasi. Hendenan ku no ta konfia otro basa riba algu di redashi ku nan a tende etc.

Awor laga un hende splikami ta kon ta posibel ku tin asina tantu doló basa riba nesesidat den pueblo, anto gobièrnu ta sobra bòshi sèn riba su presupuesto. Esaki ta un problema serio ku no ta risibiendo e atenshon nesesario di parti di órganonan di gobernashon. Mi ta menshoná órganonan di gobernashon pasobra manera mi a splika, e problema aki ta muchu mas grandi ku kualke un persona. Efektividat di gobernashon i resultadonan na benefisio di pueblo ta prerogativo di tur órgano di gobernashon. No mester ta asina ku ta James Kroon so ta prekupa ku esaki. No por ta asina ku ta James Kroon so ta wori na momento ku no ta atendé dolónan di e pueblo aki ku e efektividat nesesario.

Si tur órgano di gobernashon lokal ta kana e mesun linea i ta prekupá pa e nivel di servisio ku nos ta duna na nos suidadanonan i ku ta para ku nos pueblo pa solushoná mas tantu posibel e dolónan eksistente, nos lo tabata hopi mas leu komo pueblo i lo bo no a tende na ningun momento ku diputado Kroon a pusha demasiado duru òf ku diputado Kroon no ta kana konforme prosedura etc.

Finalisando mi ke bisa: gobièrnu tin un problema serio ku ehekushon di palabrashonnan hasi, esaki ta algu ku mester tin atenshon di tur hende i no di James Kroon so. Esaki ta algu ku ta inakseptabel. Pues laga nos tur ban pone e enfoke riba e problema real ku ta falta di ehekushon. “Allchiefs, No Indians”.

Ora nos tin esaki bou di kòntròl, situashonnan manera esun ku a presentá aki, lo pasa pa historia. Ban kue e toro na su kachu!

Share This
error: Content is protected !!