KRALENDIJK – Outomobilistanan hopi fadá a ekspresá nan mal kontentu, kaminda nan mes a disidí pa drecha e kaminda di Hanchi Amboina. Ta trata di un kaminda hopi usa i esaki ta den super mal estado. E hendenan mes a opta pa yena e burakunan ku ta mas grandi, sinembargo tin mas ku ta rekerí atenshon. Ta un situashon fastioso ku no por warda mas riba gobièrnu pa drecha e kaminda. Esaki debí ku nan outo ta keda perhudiká, momentu ku ta hasi uso di e kaminda, ku tin buraku hundu. E hendenan a aliviá e situashon ayera anochi, yenando e kaminda ku tera. Ta un alivio temporal, i ta na gobièrnu pa tuma su responsabilidat pa drecha e kaminda di un manera duradero. Suidadano Frederick Ford ta e persona ku huntu ku algun otro a tuma e inisiativa, i a kuminsá yena buraku riba kaminda. “Mi a tuma e desishon pa yena e burakunan ku tin den Hanchi Amboina. Mi tin un Tire Shop, i ta hopi hende ta yega serka mi i splikami ku ta den e kaya menshoná, nan a kibra nan tayer di outo. Mi a opta huntu ku algun amigu pa yena buraku, esaki gratuitamente, loke ta na bienestar di tur outomobilista. Tur hende ku ta deseá por yuda pa drecha e diferente kamindanan ku tin ku ta den super mal estado,” Frederick Ford a bisa.  

Share This
error: Content is protected !!