KRALENDIJK – Awe djaweps mainta alrededor di 10:30 a drenta notifikashon na warda di polis riba e liña 911 di un vehíkulo ku lo mester tabata na kandela dilanti di un kas na Kaya Uruguay den bario di Tera Kòrá. For di leu por a mira un bola di huma pretu ta bai laira. Tabata trata aki di un pikòp dòbel kabina. Bomberonan a presentá rapido na e adrès menshoná i a paga e kandela.

Informashon no ofisial ku Radio Live 99.9 FM ta disponé di dje ta indiká ku e vehíkulo tabata na e adrès, pa hasi algun trabou di mekániko na dje. Despues di a finalisá ku e trabounan na e vehíkulo, e mekániko a bai start e vehíkulo pa tèst si tur kos ta funshoná bon, tabata e momentu ku algu a zona duru i e vehíkulo a pega kandela. Habitante di un kas den bisendario a enhala huma i ambulans a bai na e sitio pa dun’é víktima trato médiko. E kousa di e kandela no ta konosí ainda pa polis. E investigashon ta andando.

Share This
error: Content is protected !!