KRALENDIJK – E sifranan di COVID-19 na nos isla a keda stabil, nan ta varia entre 0 pa 5 kaso. Aki na Boneiru nos ta den fase 2 ainda i nos tin e medidanan ku ta kuadra ku e fase akí. Por suavisá e medidanan òf bini  ku regla mas estrikto si situashon di COVID-19 na Boneiru ta rekerí esei.  

Esaki ta loke gezaghèber di Boneiru, Edison Rijna a bisa ayera durante enkuentro ku prensa. “Entrante djamars promé di desèmber e Lei Medidanan Temporal COVID-19 a drenta na vigor. Pa bo komo siudadano no tin masha kos ta kambia. Loke ta kambia ta, ku den futuro ta stipulá reglanan i kondishonnan pa biaha pa Boneiru den un ordenansa di emergensia. Ta stipula tur medida di riesgo ku ta kuadra ku e diferente fasenan di COVID-19, den un asina yamá dekreto di gezaghèber. E dekreto ta basá riba e areglo ministerial di e Lei Medidanan Temporal COVID-19.  

Te ku 15 di desèmber awor no ta permití buelo direkto di Merka pa Boneiru. Nos a spera ku lo por tabatin buelo for di Merka atrobe mas trempan. Nos ta den kombersashon ku Hulanda pa wak si entrante 16 di desèmber awor por tin buelo for di Merka. Esaki ta un desishon ku Hulanda ta tuma.

Nos ta kontentu ku Minister De Jonge di Salubridat Públiko a anunsiá ku pronto Hulanda ta haña un bakuna kontra COVID-19 i esaki lo ta disponibel pa nos tambe. Nos departamento di Salubridat Públiko ta deliberá regularmente ku Hulanda pa ta bon prepará ora por kuminsá bakuná. Ta papiando entre otro kua gruponan lo bini promé na remarke pa bakuná aki na Boneiru,” gezaghèber Edison Rijna a bisa. 

Share This
error: Content is protected !!