KRALENDIJK – Algu straño i inkomprendibel a tuma lugá kantu di laman na final di Malekon nèt na kurá di Divi Flamingo Beach Hotel. Un sitio parti sùit di Chachacha Beach ku tabata tera, awor tin piedra i baranka. Brenda Hooi, un suidadano ku ta biba ya pa mas ku 60 aña na e sitio a ekspresá e motibu di su mal kontentu ku loke a sosodé. “Hopi aktividat ta tuma lugá bou di e palu na e sitio i hendenan di edat avansá tambe ta hasi uso na e lugá bou di e palunan. Loke a sosodé awor, a destruí e área kaminda hendenan ta sinta i gosa di nos dushi laman. Hende ta bin den ròl stul i otronan ta organisá BBQ, ku un palabra un lugá kaminda hopi hende ta usa pa distraishon. Diripiente mi a lanta un dia i a topa kantidat di piedra i baranka bashá kaminda e hendenan ta sinta bou di e palu. Ta un área ku hendenan di SELIBON N.V. ta mantené ku regularidat pa e ta limpi. Loke ta sosodé, e palu di Nim ta basha hopi foyo i sea SELIBON òf nos mes ta limpia e área. Awor ku a pone e piedranan, no por mantené e lugá mas, loke ta bai bira un desaster. A pone e piedranan den un forma kon ku ta manera ta bisa. Mi tin 68 aña bibá den e kas pegá ku e Malekon, nunka ántes mi a mira algu manera esaki ku ta daña e forma ku por krea ambiente riba Malekon. Ta di lamentá loke a opta pa hasi, asina krea un lugá ku tabata bunita den un frakaso. Hende lo usa e piedranan pa tira otro kuné tambe durante ku nan tin problema i tur e konsekuensianan,” Brenda Hooi a bisa.  

     

Share This
error: Content is protected !!