KRALENDIJK – “Bonaire Wolf-Pack Baseball Foundation” a kuminsá di un tarea di tres tata ku ta Andy Ignacio, Kumar Piar i Jairo Gomez. Tur wikènt òf momentu ku tabata por, nan tabata bai fèlt ku e muchanan, muchanan di 3 i 4 aña i kuminsá ku e parti di T-ball ku ta siña e muchanan kon pa hunga beisbòl.

Esaki e presidente sr. Andy Ignacio a bisa den entrevista ku nos redaktor deportivo Ibi Piar e siman aki. Despues segun sr. Ignacio a sigui bisa, nan a kuminsá haña algun mayor ku a aserká nan, kendenan a mustra interes i puntra si nan tambe por trese nan yunan pa trein?

E kos a bira serio di kua a disidí di hasi un “tryout” den stadion i invitá algun mayor pa mira kon e interes realmente ta den esaki. E interes a bira asina haltu ku a disidí di organisá mas mihó i hasi esaki mas ofisial. Den luna di yüni nan a disidí di bai lanta e fundashon ku yama “Bonaire Wolf-Pack Baseball Foundation”.

Mas aleu e presidente sr. Andy Ignacio a bisa ku e fundashon tei i tur djárason atardi di 5or pa 6or nan ta trein. Antes nan tabata trein na Stadion di Playa riba fèlt di futbòl. Mirando kon e moveshonnan di futbòl a kuminsá bèk, pa kua nos mester e move foi stadion di Playa.

Den kombersashon ku Indebon nan a logra haña Jossy Boekhoudt Ballpark.
E orario a keda meskos ku ta di 5’or pa 6’or. Mayoria mayor ta finalisá trabou 5’or. Hopi mucha ta yega treinen i ta yega na tempu tòg, mustrando enorme interes pa siña e deporte di beisbòl. Despues di e enfoká riba e parti di nan propio ekipo ku ta Wolf-Pack, a yega na e idea pa deporte eskolar manera ántes tabata e kaso den diferente ramo di deporte.

Aki nan a yega na e idea pa ban hasi esaki beisbòl. Dikon beisbòl? Beisbòl aki na Boneiru ta práktikamente drumí, na soño pues i nan ke hasi algu kuné pa lanta o sea rebibá e deporte di beisbòl. A kuminsá sondea e interes den esaki.

Nan a bai skol klasnan grupo 4, 5 i 6. Na skol nan a papia ku e Mener di Gym. A traha un karta pa nan, un formulario di registrashon i nan tabatin un fecha ku nan por a registrá. No tabata sa kuantu mucha lo a bai registra, pensando ku 10, 20 o 30 mucha lo a registrá, pero atrobe tabata un sorpresa.

Tabata un sorpresa grandi debí ku un total di 70 mucha a registrá di kua na Playa 50 i na Rincon un 20 mucha a registrá. Treinen a kuminsá siman pasá djamars tantu na Rincon komo na Playa. Na playa a haña bon koperashon di e doñonan di Less Indians Ballpark i ta trein di 5or pa 6or, pa kua “Bonaire Wolf-Pack Baseball Foundation” ta yama un danki na nan.

E siman aki nan a trein djamars i tambe lo trein djaweps.
Atrobe hopi mucha a mustra interes i bishitá e treinen di djamars último.
Hopi mucha, pero e “coach”nan tin e don i pasenshi pa atendé ku e muchanan pa siña nan e deporte. E intenshon pa e parti eskolar ta pa trein e muchanan sigur 4 siman i ta solamente 1 ora nan tin pa esaki.
No por hasi mashá ya ku ta solamente 1 ora tin pa atendé ku 50 mucha.
Tin mucha ku tin algu di konosementu di e deporte i tin ku no sa mashá ainda di esaki.

Pero e “coach”nan di Wolf-Pack ku hopi pasenshi ta atendé ku e muchanan pa nan siña e deporte di beisbòl. Esaki sr. Andy Ignacio presidente di Wolf-Pack Foundation, a bisa den entrevista e siman aki ku nos redaktor deportivo Ibi Piar.

Share This
error: Content is protected !!