KRALENDIJK – Sanikolas i dos di su ayudantenan a bishitá Kas di Kuido di Fundashon Mariadal. Awe mèrdia nan a presentá serka nos grandinan, loke a kai mashá na nan agrado. Konforme tur regla di hòspital, a pidi Sanikolas pa pasa serka nos grandinan ku tur aña ta ansioso pa Sanikolas pasa i saludá nan. Naturalmente nan tabata ku tapa boka bistí loke a wòrdu kontrolá for di na entrada di hòspital. Sanikolas i su ayudantenan mester a kontestá algun pregunta serka funshonarionan di Fundashon Mariadal promé ku a drenta i bishitá nos grandinan. Sigur serka Sanikolas i pitnan ta rekerí hopi atenshon pa protekshon, pasobra nan ta bini for di un lugá kaminda hopi hende ta infektá ku e vírùs. Sinembargo nan a pasa un temporada den karentena, pues nan ta liber di Corona! Sanikolas a dirigí algun palabra pa e hendenan di edat avansá na e sitio, entre otro el a bisanan: ”Sanikolas semper tin boso na kurason. Mi a pasa saludá via distansia i no por yega serka, pero mi a trese un kaha di regalo ku pepernoot i mangel aden, pa pasa boka durante dianan di fiesta. Kòrdá tene pasenshi ku e enfermeranan ku ta hasi hopi esfuerso aña den aña fó, pa duna boso kariño i amor. Mi a wak den mi buki i no a topa e aña aki ku niun di boso nòmber. Pues e komportashon ta manera mester ta. Mantené i nos ta topa otro aña, momentu ku mi ta aki pa nos selebrá fiesta di Sanikolas i liber di Corona!, ” Sanikolas a bisa. Kombinashon di potrèt ta ilustrá momentu ku enfermeranan a saka potrèt ku Sanikolas i su ayudantenan.

Share This
error: Content is protected !!