KRALENDIJK – Hóbennan di Liseo Boneriano, MAVO-4, HAVO-5 i VWO-6, a presentá loke nan a  skohe pa hasi investigashon di dje, un asina yamá ‘profielwerkstukken’. Ta trata di diferente tópiko. 2 di nan ku a hala hopi atenshon, ta esun ku Jean-Mary Emer i Roclin Martis, a kombertí Sargassum den biodiesel, i e otro kaminda Rosa Rijna i Elhomir Winklaar, a traha un avion ku ta milieuvriendelijk. E avion ta funshoná riba energia di solo. 2 hóben a duna un splikashon kon nan a yega na e avion pa usa energia di solo pa e bula kuné. Tambe a presentá kon a traha e avion. Ta usa panel di solo pa kapta rayo di solo i pone ku e ta bula. No ta posibel pa por laga e avion funshoná kompletu riba panel di solo. Ta hasi esaki den kombinashon ku indirekte zonne-energie. Na final di nan presentashon, a duna un demostrashon kon nan a pone e avion bula.  

Despues a tuma parti kaminda otro 2 hóben a kombertí sargassum den biodiesel. Sargassum ta un yerba di laman i esaki na algun okashon a yega kosta di Boneiru i ta kousa molèster i problema. Hende no sa kon pa deshasí di dje. Esaki a motivá e hóbennan pa yega na un sistema pa kombertié den algu ku por usa, den e kaso aki biodiesel. Nan a sak’é, lab’é i lag’é seka i sigui ku algun proseso promé a logra yega na biodiesel. Mener Sindey Martijn a bisa ku normalmente ta tene e presentashon poko promé ku final di aña eskolar. E aña aki a opta pa hasié mas trempan, loke ta na bienestar di e muchanan. Awor nan por konsentrá mas pa nan eksamen pa terminá skol.  

Share This
error: Content is protected !!