KRALENDIJK – Debí na e pandemia i medidanan di COVID-19, mayoria aktividat di Union di Penshonado pa Adelanto i Hustisia, sekshon Boneiru (UPAH Bonaire) no por a sigui e aña akí. Esaki ta konta pa nos tradishonal Sena di Pasku di tur aña tan gustá. Direktiva di UPAH i Komishon di Aktividat (KOMAK) sinembargo no kier a laga e aña akí pasa sin tòg hasi algu pa miembronan. Pa e motibu ei komo alternativa pa e Sena di Pasku, ta organisá e aña akí un asina yamá ‘drive-thru brùnch di Pasku. Esaki lo tuma lugá riba djadumingu, 20 di desèmber 2020 di 11or di mainta pa 1or di mèrdia riba e lugá di parker di Banko Maduro banda di ‘Little Havana’ den Kaya Bonaire. E drive-thru ta pa miembro i nan invitadonan.

Aña 2020 tabata un aña hopi pisá i fèrfelu pa mundu henter. Nos di UPAH tambe a sinti e konsekuensianan di e medidanan pa trata na kontené e brote di coronavírùs. Mayoria aktividat pa miembronan mester a para, entre otro e tradishonal selebrashon di Dia di Penshonado. Debí na e medidanan ku ainda ta na vigor lo no ta posibel tampoko pa organisá e tradishonal Sena di Pasku.

Tòg direktiva di UPAH Bonaire huntu ku KOMAK no kier a laga e aña akí kaba den un estado di ánimo minor i pensa un alternativa pa tòg brinda algu festivo na nos miembronan pa alegrá e dianan di fiesta. Pa e motibu ei a pensa pa den e esfera di Pasku, organisá un komementu di Pasku den estilo di un ‘drive-thru brùnch di Pasku’.

E preparashon di e brùnch ta den man di Karel’s Beach Bar/Zeezicht Restaurant, ku a prepará un ekskisito menú, ku UPAH por ofresé na un preis hopi abou na e miembronan i nan ivitadonan.

Miembronan ta paga solamente 15 dòler i nan ivitadonan 20 dòler pa persona.

Pa e preis akí ta haña 1 djus òf sòft, Ayaka na fòrnu, Ham di Pasku, Terderloin den mushroom sauce, Aros Noël, Salada di macaroni òf batata i komo pasaboka por skohe entre Ice Cream, Rum Cake òf Bolo di Fruta.

For di 11or di mainta esnan ku ta partisipá na e brùnch akí por pasa ku nan vehíkulo riba e sitio di parker ariba menshoná pa buska nan pakete di brùnch.

Entre tantu miembronan a risibí e invitashon pa e brùnch kaba na kas. UPAH a disidí di prolongá e fecha pa entregá e papel di inskripshon te ku djaweps, 10 di desèmber 2020. Direktiva ta supliká pa entregá e papel yená ku nòmber i kantidat di persona ku ta partisipá na ofisina di UPAH na Kaya Nikiboko Nort riba djamars òf djaweps mainta. Por skèn i manda esaki tambe pa upahbon@telbonet.net. Un suplika ta bai tambe pa por fabor pasa paga na ofisina di UPAH na tempu.

Share This
error: Content is protected !!