KRALENDIJK – Por poko boto a alkansá e hóben piskadó Gerald Martines i un amigu. Gerald Martines a konta Radio Live 99.9 FM, ku nan tabata landa piska loke nan ta hasi ku regularidat, i kasi un boto a pasa riba nan. “Tin regla, esta pèrmit pa landa piska den e área entre Donkey Beach pa Punt Vierkant i Chachacha Beach pa Harbour Village. Ami i mi amigu tabata na Punt Vierkant ta landa piska i un momentu dado, mi a tuma nota di un boto ku tabata biniendo den nos direkshon. Mi a kuminsá zuai man pa indiká ku nos ta den laman. Aki e kapitan a desviá e boto for di den mi direkshon, sinembargo el a bai riba mi amigu dimi. E amigu a tuma nota poko lat ku e boto ta bin den su direkshon. El a bai bou di awa mas rápido posibel, aki el a sinti ku e boto a chep e. Pues el a skapa na wowo di angua. E kos aki ta preokupámi hopi. Tin regla i nos ta tene nos mes na djei, tòg nos bida ta kore peliger. Ta di e forma aki nos ta gana nos pan di kada dia pa sobrebibí i ta haña nos den e situashon ya menshoná”, Gerald Martines a bisa.

Share This
error: Content is protected !!