Willemstad – Ku asombro pero ku un sintimentu prekupá, mi persona a tuma nota di un notisia dia 2 di dezèmber 2020. Mi a mira ku señora Esther Bernabela; miembro di konseho insular pa Partido UPB a indiká i hasi denunsia públiko ku hóbennan di Kòrsou ta bayendo Boneiru pa prostituí. Tambe den e mesun artíkulo, señora Nina den Heyer; diputado pa asuntunan sosial i salubridat a konfirmá ku nan tin atenshon pa e situashon aki.

Komo hóben polítiko i prekupá pa bienestar i adelanto di mi pais mi kier puntra lo siguiente; ta posibel ku señora Bernabela por indiká ku sifra kuantu ta e hóbennan di Kòrsou ku a señalá òf identifiká ku a bai Boneiru pa prostituí? I tambe di ki edat nos ta papiando ora ta bisa mucha muhé yòn?

Ku ta asina, tin informashon di e hóbennan aki ku organisashon di Kòrsou por tuma kontakto pa guia e hóbennan aki? Si ta bisa ku prostitushon ta ilegal i a señalá e mucha muhénan, bunita i atraktivo di Kòrsou ta bayendo Boneiru manera a ser indiká den komunikado, a atendé ku nan den forma hudisial?

Mundialmente ta eksigí ora ta papia, ku mester ban traha mas basá riba sifra i ora ta papia di algu di tal índole pa no generalisá esaki. Pues mi kier pidi señora Bernabela pa e por publiká sifra i tambe akshonnan hasi ku e grupo di Kòrsou aki. “Pa dal kachó no sa falta palu” i komo hóben ami sigur lo vigilá ku wowo di falki pa kuida i protehá e baranka aki.

Rekonosiendo e pandemia aktualmente riba salubridat ku ta eksigí hopi tempu, mi kier spièrta nos departamentu di salú general i instanshanan lokal aki na Kòrsou. Ban fortifiká nos trabounan i sigui eduká i informá nos mucha-i hóbennan riba komportashon seksual. 1 di dezèmber tabata dia mundial di konsientisashon di HIV, mi kier hasi un yamada pa nos no ban warda riba e fecha aki so pa nos traha i papia riba e situashonnan aki. Ban usa plataformanan riba ret teknológiko, skolnan i organisashonnan pa yega na e mucha i hóben ku mester di informashon.

Na nos hermana isla Boneiru, mi ta konvensí ku nos tin kosnan pa traha ariba aki na Kòrsou i mi ta kere ku huntu ku nos hermana islanan tambe semper nos por traha huntu pa adelanto i bienestar di e islanan. Ku determinashon pa Kòrsou ami; Eugene Valpoort ta tèrminá pendiente di reakshon i informashon.

Share This
error: Content is protected !!