Kralendijk – Abase di un desishon tumá pa Kolegio Ehekutivo, preis di awa di bebe na Bonaire lo subi ku mas ku 80% pa luna. E subida ta relashoná ku desishon di Kolegio Ehekutivo riba e tarifa ku ta bai kobra pa kloaka na Bonaire.

Sigun e desishon di Kolegio Ehekutivo, pa kada küb di awa di bebe, gradualmente lo mester bai paga riba e USD 3.768 aktual un suma di USD 1.20 adishonal i alabes, kada kas ku ta konektá na e kloaka mester bai paga USD 25 pa luna adishonal riba gastunan fiho di USD 7.06 ku tin aktualmente. Esaki ta pone ku preis pa awa di bebe pa un kas ku ta usa masoménos 10 küb pa luna ta subi USD 44.76 pa luna te ku USD 81.76 pa luna. Un subida di 82.7% riba bo gastu mensual pa por hasi uso di un derecho fundamental di awa limpi pa bebe.

Subida Inakseptabel

‘E impuesto ku Kolegio Ehekutivo kier implementá pa awa di kloaka ta kousa un subida drástiko riba kosto di awa pa bebe. Esaki lo tin un efekto enorme riba gastu mensual di kada hogar i hinka e famianan ku ya ta den un situashon finansiero difísil den mas gastu. Akseso na awa di bebe ta un derecho humano i Gobièrnu mester stimulá pa tur hende, irespekto nan entrada, tin akseso na Awa pa bebe. Ku e subida aki ta okashoná netamente lo kontrali. Esaki ta un maneho kruel i ta apsolutamente inakseptabel.’, konforme deklarashon di konsehal Clark Abraham [DEMOKRAT].

Maneho Kontradiktorio

Ku sosten di Kolegio Ehekutivo, Sekretario di Estado van Ark a stipulá e norma di mínimo sosial na USD 945 pa luna, apesar ku investigashon hasi pa Regioplan ta mustra ku un persona soltero mester di por lo ménos USD 1349 mensualmente pa por biba na un manera digno na Bonaire. Kolegio Ehekutivo a indiká ku ta stipulá e norma di mínimo sosial na e nivel ei paso ta hiba maneho pa baha gastu mensual pone ku USD 945 lo mester yega pa kubri gastunan mensual. ‘E subida drástiko aki riba e kuenta mensual di awa pa bebe ta un maneho kompletamente kontradiktorio na lokual Kolegio Ehekutivo a primintí pueblo i lo hinka nos pueblo den aun mas pobresa.’, Abraham ta terminá.

Share This
error: Content is protected !!