KRALENDIJK – Kinder Ombudsvrouw pa islanan, Bonaire Saba i Sint Eustatius (islanan BES) Margrite Kalverboer a papia na Radio Live 99.9 FM. Ta trata di Kinder Ombudsman, sinembargo hopi ta yam’é Kinder Ombudsvrouw. Tweede Kamer a nombra su persona komo Ombudsman pa mucha na aprel 2016. E no ta hasi su trabou susó; e ta traha ku un tim di 12 hende. “Kosnan ta kana hopi bon i nos ta pendiente pa por yega Boneiru. Nos tarea komo instituto ta pa kosnan ta kana bon ku muchanan di Hulanda i islanan BES. No solamente e muchanan, sinembargo tambe hende mayor di edat. Último biaha ku nos tabata na Boneiru tabata na luna di yanüari, i debí na e pandemia di CoViD-19 nos no por a regresá.   

Manera situashon ta pèrmití, nos ta bini personalmente na Boneiru. Na luna di yanüari nos a papia ku diferente instansia manera skol, polis i ministerio públiko, i na momentu ku nos regresá, sigur nos ta sigui ku bishita di esnan konserní, pa duna un man na esnan ku ta rekerí atenshon.   

Nos ta bai kuminsá ku ora èkstra spesial pa atendé mas ku e hendenan di Karibe Hulandes. For di 30 di novèmber pa 10 di desèmber, durante 9’or pa 2’or di mèrdia ora lokal por tuma kontakto ku nos pa medio di yamada. Por bèl e number telefón: +31 70 8506 995. E mucha por yama i mayornan, pa ekspresá prekupashon. Entre otro por yama si tin problema di malesa, pobresa, òf muchanan no ta bai skol. Tur kos ku e hende ta pensa ku nos por yud’é kuné. Nos por trese nan problema kaminda e mester haña ayudo. Esei ta nos tarea.    

Nos ta hopi interesá pa tende si tin kos ku no ta bai bon, sea pa motibu di Coronavírùs òf otro kos. Por wak riba www.dekinderombudsman.nl pa haña formulario pa yena pa nos por duna ayudo. Ya tin hopi mucha ku a akudí pa yudansa. Si nan yama ta mas fásil pa nos komuniká i yuda nan. 2021 nos ta plania pa bin na BES Eilanden na luna di mart. Tur kos ta dependé di e situashon di Coronavírùs”, Kinder Ombudsvrouw a bisa.

Share This
error: Content is protected !!