KRALENDIJK – E dia internashonal di e malesa Aids a pasa bai sin atenshon. Esaki ta debí ku tur konsentrashon aktual ta riba Coronavírùs i ta laga tur otro kos un banda, Konsehal Esther Bernabela a bisa. “Mi a hasi un remarke na diputado Nina den Heyer, pa atendé e parti di edukashon i prevenshon pa loke ta trata e malesa di HIV. E malesa aki ta un tabú den nos komunidat. Nos no a logra apesar di e tempu ku a pasa, pa por papia di e malesa. P’esei ta importante pa un programa di edukashon di e malesa i edukashon seksual. Hóbennan for di 12 aña ya ta kuminsá praktiká sèks. E atenshon pa e tipo di kosnan aki ta poko. Ta notabel atraves di sifra, di enfermedat seksual ta subi. Esaki ta spesialmente serka hóbennan. E ta duel mi ku bo ta haña un hóben riba 21 aña, ku bo ta splik’é tokante enfermedat, loke nan ta bisa ku nunka promé a tende di esaki. E bida di machismo ku ta biba den nos hendenan, ta pone ku nos no ta hasi uso di kòndòn pa protehá kontra malesa. Ta importante pa por tin un mashin pa e hende por kumpra un kòndòn. Despues di 12’or di anochi no ta posibel pa un hende kumpra kòndòn. Esaki ta pone ku e ta tene relashon sin usa kòndòn. Kòntròl di prostitushon no ta aktivo”, Konsehal Esther Bernabela a bisa.  

Share This
error: Content is protected !!