KRALENDIJK – A pidi famia di akusado den e kaso di asesinato di Rafilino Boezem, durante tratamentu di e kaso, pa nan bandoná sala di korte. E tata di e akusado a puntra fiskal; si tabata su yu tabata metí den un kaso, si e lo a bandoná sala di korte?

Djadumingu 14 di yüni 2020 den oranan tempran di mainta, polis a bin topa ku e hòmber Rafilino Boezem di 39 aña mal heridá na un kas na Kaya Otomac. Lamentablemente e la fayesé e mesun dia a konsekuensia di e heridanan.

Despues ku un testigu a bini dilanti, polis a detené e èks partner di e víktima di inisial D.E.M.R. di 26 aña di edat. E la aseptá ku e la hinka e víktima ku un kuchu. Tambe e dama a deklará ku loke a sosodé tabata defensa propio. Na diferente okashon e tabata víktima di maltrato na man di e hòmber.

Ministerio públiko ta akusá Dayerona R. Di asesinato premeditá di e hòmber Rafilino Boezem. A hasi uso di dos sala pa trata mentu di e kaso, asina separá kada famia pa evitá ku e situashon por eskalá entre famia di e víktima i famia di e akusado. Despues di poko tenshon, a laga mayornan i ruman muhé di e akusado den sala di korte, ya ku famia di e víktima no a presentá.

Cathlyn Boezem ruman di e víktima a duna su reakshon, splikando dikon nan no tabata tei. ”Nos no tabata presente 3 di desèmber, paso nos no tabata na altura ku lo a papia tokante e kaso. Nos a keda hopi straño mirando famianan di e akusado presente”, segun Cathlyn Boezem. Nos tabata na altura ku lo a skors e kaso i ku solamente hues, fiskal i e akusado lo tabata presente. Si nos tabata sa ku lo a papia tokante e kaso, sigur nos lo tabata presente. Ministerio Públiko mester komuniká mihó.

Hues mr. Stephan Van Lieshout riba djaweps 3 di desèmber, a trata e kaso den pro forma pa medio di konferensia di video. E abogado defensor mr. Marielle Verkade tambe tabata presente pa medio di konferensia di video for di Kòrsou.

Tantu fiskal komo abogado defensor no tabatin mas deseo pa e investigashon. Fiskal a remarká ku famianan di e víktima a hasi petishon pa dos mucha menor di edat por a presensiá tratamentu di e kaso. Hues mr. Van Lieshout a haña esaki un tiki delikado. “Mi ke pa un eksperto duna klaridat si esaki no ta dañino pa e mucha promé ku mi aprobá e petishon. “

Hues a splika e motibu pa posponé e kaso. “Nos tur ta di akuerdo ku e kaso ta demasiado kompliká pa por hasié pa medio di konferensia di video”, hues a bisa. Korte den Promé Instansia lo atendé kontenido di e kaso riba 14 di desèmber 2020.

Share This
error: Content is protected !!