KRALENDIJK – Tata di akusado Dayerona R. a bisa durante tratamentu di kaso den korte, ku e tin rèspèt pa polis, sinembargo e departamentu di reshèrshi no a hasi un bon trabou. Dayerona R. ta den prison, miéntras e ta sperando tratamentu di su kaso dia 14 di dezèmber binidero. Ta akus’é di a mata e norteño Rafilino Boezem, dia 14 di yüni 2020.

Segun e tata Dayerona R. a hasi vários denunsia di maltrato kontra Rafilino, sinembargo polis no a hasi nada ku esaki. “Si fo’i kuminsamentu a detené Rafilino, e situashon lo no a yega manera ta awe.

“Dos siman promé ku e asesinato a tuma lugá, e defuntu a kibra glas di outo di e akusado, sinembargo polis no a atendé loke a sosodé. “Reshèrshi no a hasi un bon trabou. Falta hopi kos pa investigá. Nan tin ku bai den bario i skucha kiko ta wordu papiá.” Nort di Saliña ta un bario hopi uni, i tin kosnan a pasa ku bo no ta skucha den sala di korte.

“Testigunan a mira un rasta lomba sunú kore bai. Reshèrshi mester drenta bario i hasi nan trabou na drechi”, tata di e akusado a bisa. Mama di e akusado a bisa: ”Mi tin un  deseo. Mi yu tin ku papia, ta e so por papia tokante tur loke a sosodé. Mi a hinka tur kos den man di Dios. ”E tata ta para riba i ekspresá su mal kontentu, esta ku reshèrshi no a hasi nan trabou bon, i su yu no ta haña hustisia. E investigashon no ta kompletu. Hustisia mester prevalesé. Ora bo hasi malu bo tin ku sinta riba e blar, sinembargo mester pone e persona korekto sinta riba e blar!”  

Share This
error: Content is protected !!