KRALENDIJK – Arthur Sealy ta bisa ku den un programa radial un oyente a sugerí mi pa lanta un partido polítiko. Esei lo mi no hasi, ni subi lista di un partido. Loke Bonaire por a eksperensia último siman riba tereno polítiko, no ta nada mas ku un bèrgwensa. Diputado Nina den Heyer a ekspresá esei tambe pero ta keda komo diputado i pèrdè kredibilidat.

Ami ta preokupá, no tin ningun klase di liderazgo i maneho na Bonaire. Ta imposibel aseptá ku un diputado ta bai sin responsabilisá e káos ku el a okashoná i ta dal pueblo un bòftá den su kara di bisa e ta drenta Konseho Insular, e ta keda lider i ta regresá komo diputado. Un otro diputado ku tin rapòrt devastador na su karson ta keda sinta manera nada a pasa. Miembronan di koalishon ku sa ku ta trata di violashon di reglanan di bon gobernashon ta sera wowo.

Kurso di liderazgo di MPB a resultá den un frakaso total. Kiebro den MPB i dos konsehal ta tuma retiru sin responsabilisá na pueblo. Ta pone hefe di salubridat riba nòn aktif. Ta kita hefe di Finansa sin pone un otro, Mi ta puntra si tur hende na Bonaire ta kontentu ku: kareteranan, violensia doméstiko, violensia kontra mucha, pobresa, bankonan di kuminda, tráfiko ku ta pega, tenshon den bario, prostitushon riba eskala grandi, tiramentu di shushi unda ku ta, no tin kas pagabel pa pueblo, produkshon di nos kuminda, falta di rèspèt kontra outoridat. Unda nos batidónan di klòk ta? Den tur direktorado tin bòmbòshi pero ta sera wowo i bira egoista.

Mi ta tende bo puntra kiko abo mes ta hasi. Awèl mi a tuma e desishon pa duna un kurso di polítika. Mi sa ku den pasado a duna un kurso di tal índole pero awor Bonaire ta parti di Hulanda i e relashon estatal nobo mester di un aserkamentu otro. Ta un introdukshon ku ta konsistí di 20 anochi di kontakto di dos ora pa anochi partí den un anochi i djasabra pa siman. Pues 10 siman. E kurso ta na papiamentu pa persona for di dieseis aña i ta pòrnada. E kantidat di partisipante ta maksimal 20. Loke tin mester ta un espasio, tambe pòrnada pa duna e kurso. Partisipante ta siña kiko ta partido polítiko, kiko ta OLB, Kiko ta Konseho Insular, Kolegio Ehekutivo, kon votamentu ta reglá, ki derecho Konseho Insular tin, kiko ta un moshon, un moshon di deskonfiansa, un amienda., funshon di CFT, di representante di Reino, kon lesa dokumentonan gubernamental, kon analisá programanan di akshon i komunikadonan di partidonan polítiko i di asina yamá analistanan polítiko i kon hiba un debate polítiko. E kurso ta pa alsa konosementu di funshonamentu di polítika. Mi definishon di polítika ta: arte di maneho gubernamental. Mi ta spera di haña koperashon di komunidat.

Share This
error: Content is protected !!