KRALENDIJK – Djarason mèrdia trahadónan di brantwer a uni na boka di trabou i a entregá un karta, ekspresá nan mal kontentu na e Komandante General Interino, Albert Gieling. Ta trata di un situashon ku ya pa hopi aña ta andando i no por yega na un akuerdo pa loke ta trata e puntonan. Esaki ta loke por a komprondé serka trahadónan presente. Na e okashon tabata presente gran parti di empleadonan di brantwer i miembro di sindikato STrAF Sedney Marten. Huntu nan a entregá e karta na Komandante General Interino, Albert Gieling. Miéntras e trahadó Desmond Trenidad a hasi entrega di e karta, kolega nan a keda ripití: ”Nos ke pa kos drecha, esei nos ta lucha pe! Tin un rapòrt ta bai bin i nos tin hopi aña ta warda.”

Por a komprondé di nan ku nan koleganan na Saba i Sint Eustatius ta sostené nan.

Komandante General Interino di BKCN, Albert Gieling, a dirigí palabra na e momentu, i momentu el a menshoná ku mayoria trahadó ta di akuerdo ku e proposishonnan den e karta ku nan ta bai haña un tarea èkstra; trahadónan presente a reakshoná fuerte i na bos haltu kontra dje. Nan a ekspresá ku loke el a bisa no ta kuadra ku realidat. Albert Gieling a sigui bisa ku el a skucha nan mensahe i tin kos ku ta rekerí atenshon i lo tuma nota di nan i spera yega na un komprondementu un ku otro. Sedney Marten kende ta miembro di sindikato STrAF, a lesa e karta i a dirigí algun palabra na Prensa.

Share This
error: Content is protected !!