KRALENDIJK – Radio Live 99.9 FM a papia ku Martijn Zwiers di BWM tokante e rotònde nobo ku tin na altura di Kaya Amsterdam i Kaminda Djabou. A tuma nota ku trabou nan ta praktikamente kla pa habri e kaminda pa dianan di fiesta, sinembargo tin e impreshon ku e kaminda ta smal. Meskos ta e kaso na Kaya Carlos A. Nicolaas enfrente di NAPA Auto Parts. Tin hopi espasio na banda pero e kaminda ta smal konstruí. Martijn Zwiers a bisa ku e parti pa loke ta trata midí òf hanchura di kaminda no ta den nan man. “Simplemente nos ta haña tarea pa ehekutá kaminda i e midínan, esta kon hanchu un kaminda mester bin, gobièrnu ta diseñá e proyekto. Nos ta traha segun e midínan ku nos a haña riba mapa. E ta kasi 6 meter di hanchura. Un kos mi sa ku e kamindanan ta trahá di tal forma ku un trùk i treiler por pasa. Pues no tin indikashon ku e kaminda òf e rotònde resien konstruí ta smal. Solamente loke ta diferente for di e rotònde nan aktual ta e sirkulo. E ta untiki mas chikitu ku e otronan den Playa.

E rotònde nobo aki pa djabièrnè awor ta kla, den e sentido ku outo por hasi uso di dje. Na luna di yanüari ta ser’é temporal pa finalisá e trabou den su totalidat. Ta bon pa informá ku no ta pèrmití trùk i treiler (konteiner) hasi uso di e rotònde ariba menshoná pa awor. Esaki debí ku e kaminda no ta apropiá aktualmente pa vehíkulo pisá. Pues pa protekshon di e trabou. Ta urgí pa vehíkulo di peso, hasi uso di otro kaminda pa yega nan destinashon, sin pasa na e rotònde na Kaya Amsterdam i Kaminda Djabou”, Martijn Zwiers a bisa.      

Share This
error: Content is protected !!