Kralendijk – Durante transkurso di e aña maldishoná aki, nos por a tende for di tur huki ku nos mester sali mihó for di e situashon aki. E Pandemia a mustra nos riba nos vulnerabilidat i nos debilidatnan, e pandemia aki mester hasi nos mas fuerte. Tur e frasenan aki ta kosnan ku ta zona bunita i ku naturalmente nos tur por suprayá. E pensamentunan aki sin embargo no ta bai di mes. Papia so, no ta trese solushon ni ta hasi e situashon mihó. Mester substansia e palabranan ku vishon i akshon. I ku esaki mi no ta papiando di gobièrnu so. Mi ta papiando di nos komunidat den su totalidat. Tur organisashon komunitario, deportivo, religioso etc etc.

Bo a tuma tempu pa inventarisá unda bo ke ta despues di e pandemia;

Bo sa kaba kiko ta e espasio ku abo mester pa por kumpli ku bo tareanan i karga bo responsabilidat;

Kon ta para ku bo medionan finansiero pa bo por sigui?

Bo sa kaba ki dia bo aktividatnan ta wòrdu reanudá?

Si nos kue por ehèmpel nos selebrashonnan kultural mas konosí ku ta Regata internashonal, Karnaval (2022) i dia di Rincon. Nos por sali for di e punto di bista ku ya e organisashon nan aki ta den preparashon. Ku ya nan a fiha rumbo pa desaroyá bai buska 2030. Ku e aña aki a wòrdu usa pa prepará i drecha tur loke a tabata defisiente den pasado? Si esaki no ta e kaso, por fabor risibí e yamada aki komo motivashon pa nos prepará. Nos no por pèrmití nos mes di bai bek komienso. Nos no tin mag di pèrmití nos mes kuminsá gatia atrobe. Den palabranan di un amigu di hopi edat; “nos mester por kambia kombustibel, durante vuelo pa nos por sigui bula”.

Hopi a menshoná “e normal nobo”; bo tabata sa ku bo por influensha e normal nobo? Pa bo hasi esaki, bo lo tin di determiná e espasio ku mester komo organisashon. Krea bo mes normal nobo, teniendo kuenta ku bo nesesidat i nesesidat di e otro sin lubidá naturalmente e aspekto di seguridat. No sinta warda te ora esaki wòrdu pone pa bo. Ser pro-aktivo, usa tempu pa wak kon bo por mehorá komo organisashon i kon pa duna un mihó produkto òf servisio na e pueblo aki, ku kada dia ta bira mas eksigente, mas kritiko i ku sa kon balorá kalidat. Sea konsiente ku e pueblo ku tabata biba di mediokrisidat ya a pasa pa historia.

Kòrda ku keda hasi e mesun kos aña den aña fo, i spera resultado diferente, ta sinónimo di lokura.

Share This
error: Content is protected !!