Kralendijk – Resientemente a bin tuma nota di sierto moveshonnan bou di trahadónan den Kuerpo di Bombero pa loke ta trata entrega di un karta di deskonfiansa. Esaki a sosodé sin konsentimentu di ABVO te pa ABVO por a representá su miembronan den e kaso aki. Sindikato ABVO Boneiru bou di ningun kondishon por para responsabel pa kualke konsekuensia ku esaki por trese kuné.

Den media sosial ku asombro a bin tuma nota di e akshon aki, sinembargo ora a mira sierto personahenan riba e potrèt por a konkluí di kua direkshon e bientu ta supla.

Mester menshon ku pa loke ta trata representashon ofisial i rekonosé pa gobièrnu di Reino pa loke ta trata tur pero tur Departamentonan di RCN, ta ABVO, ACOM, NAPB i WICSU di Islanan Riba. Niun otro mas, esaki a keda ratifiká den Sector Overleg na yüli último na momentu ku otro kier a infiltrá òf plak pa trata na infiltrá.

ABVO ta pidi tur su miembronan pa semper akudí serka nan sindikato ku ta rekonosé i ku tin representashon ofisial. No bai tras di akshonnan manipulatorio di terseronan ku por hinka bo den problema.

ABVO ta e organisashon mas grandi pa loke ta trata islanan BES, Kòrsou i Sint Maarten i ku tur su dokumentunan ofisial na òrdu i kumpliendo ku reglamentunan i statuto. ABVO ta e úniko ku ta tene su Reunionnan di Konseho kongresonan i elekshonnan.

ABVO tin su sede disponibel ku na momentu ku ta nesesario pa kualke reunion informativo, negoshashon òf akshon ta ei ta reuní i plania kualke strategia.

ABVO ta pidi tur su miembronan pa sea atento pa infiltrantenan ku ta aktua deskabeyá òf pa represaya kontra derota.

ABVO ta duna formashon na su lidernan pa nan ta bon prepará i ku un bon konosementu di Leinan Laboral dor di partisipá na kursonan riba e tereno aki. ABVO su Presidente a sigui tambe kurso di konosementu di Lei general.

Nos semper a i lo sigui sali na defensa i para pa derecho di su miembronan. Manera nos slogan ta bisa, Hustisia Sosial i Derecho Igual.

Entretantu den konsulta ku Representante di Reino i ku otro partnernan di Sector Overleg sea ta virtual òf via e-mail ta atendiendo e diferente rapòrtnan di O&F i semper nos tur huntu ta sali na fabor di e klase trahadó. Un miembro kisas no ta nota esaki, pa e echo ku pa medio di e normal nobo tur kos ta sosodiendo den forma virtual of digital.

Pa kualke informashon òf konseho por hasi esaki via app na number di telefòn 5223099 òf via mail na robertsances@gmail.com.

Un organisashon Sindikal ta e kara di su miembronan i den tur sentido di palabra ta ku representashon ofisial so por trese kambio i ta huntu ta logra algu.

Kompañeronan OJO !!!!!

ABVO ta sigui krese na miembresia i ta trahando duru na adelanto di su miembronan.

Share This
error: Content is protected !!