KRALENDIJK – Riba djasabra 12 di desèmber Selibon, Radio Live 99.9 FM i e proyekto ‘NOBO’ ta organisá un evento pa famia. E organisadónan ta spera di hala mas atenshon riba importansia di redukshon di shushi i resiklahe di plèstik na Boneiru. Famianan ta keda invitá pa entre 9’or i 11’or di mainta bin entregá nan desperdisio di plèstik na Plasa Medio Ambiente. En kambio pa nan esfuerso adultonan ta haña un tas re-usabel grátis i muchanan ta haña un trit di un dushi eiskrim di Tio Pepe. E shou di mucha na Radio Live 99.9 FM ‘Panchito Live’ ta transmití e evento di Redukshon i Resiklahe aki.

Probablemente aki 20 aña separashon di shushi ta un parti nòrmal di nos rutina diario. Pero no ta fásil pa kambia nos komportashon. Pues esaki ta e momentu pa duna informashon na nos hóbennan tokante redukshon di shushi i resiklahe na Boneiru.

Selibon a krea e infrastruktura ku ta nesesario pa kolektá fluho di shushi manera plèstik, papel i kos di metal na Plasa Medio Ambiente, Hato i Morotin. Ora nos separá nos shushi, nos por:

1. Redusí e kantidat di shushi ku ta depositá na lèntfel, i

2. Resiklá produktonan residual na Boneiru.

Tur fluho di shushi ku Selibon kolektá separadamente, ta keda almasená separadamente na lèntfel, en espera di prosesamentu mas aleu.

NOBO ta un proyekto lokal di resiklahe di plèstik ku WWF-NL (Fondo Mundial di Naturalesa – Hulanda) a finansiá i ku ta usa plèstik tipo 2 pa traha produktonan nobo i inovativo, manera aparato pa tene telefon, kos pa pone glas ariba i makutu chikitu. Na e momentunan aki Fundashon Mariadal ta NOBO su suministradó mas prinsipal di plèstik tipo 2, yamá tambe HDPE. Nos ta spera ku e evento ta inspirá habitantenan di Boneiru pa separá nan shushi di plèstik i depositá plèstik tipo 2 den e klikonan oraño di NOBO na Plasa Medio Ambiente. Bishitá ‘NOBO Bonaire’ riba Facebook pa mas informashon.

Share This
error: Content is protected !!