KRALENDIJK – Radio Live 99.9 FM a papia ku e konosido haladó na Boneiru Raymunda Martis. El a yega di yuda masha hopi hende ku a konfrontá problema ku salú. Aparti di e, tin un persona mas ku ta ehersé a trabou, kende su nòmber ta Ernst Delanoy. Raymunda Martis a bisa ku el a mira su tata hasi e trabou di haladó i asina el a siña. E kos tabata den dje. Ta un don di Dios e ta. “Mi a siña, sinembargo nunka mi a bai huntu ku mi tata kaminda e ta praktiká. Mi tabata mira loke e ta hasi for di un distansia. Mi tabata mir’é hasié algu ku e hendenan usando un pipa. Semper mi tata a bisa e ke p’ami siña, pasobra e tabata wak den mi, ku mi tin e don pa hasi loke e ta hasi. Nos tabata 5 ruman i mi tata a skohe òf tabata deseá pa ami hasi e trabou di haladó. Ya ta 48 aña ta ehersé e trabou. Mi ta yuda hende ku ta spantá, sea adulto òf mucha, mi ta yuda ku entre otro; hende spanta tristesa i prekupashon. Otro kos ta na momentu ku hende tin doló spesialmente den barika; padrion òf madre a skit, tambe mi ta kura esaki. Ta tratamentunan di hopi aña ku ta biba den komunidat.    

NO TA HUMA PIPA MAS 

Awendia no mester di usa humamentu di pipa pa kura e hende. For di desèmber 2019, mi no ta huma pipa mas. Hopi hende kisas no por ku huma i pa e motibu aki, mi ta hasi orashon ku e hendenan. Tur kos a keda mes kos i esnan ku mester hala barika mi ta hasié normal. Tambe mi ta usa e zeta spasial ku mi mes ta traha pa hala barika. E hende mester bin sea 3, 5 òf 7 biaha. Hopi hende mi a yuda, entre otro beibi, ku awe nan ta adulto i ta trese nan yu p’ami duna tratamentu. Orashon ta yuda sea ku òf sin e huma di pipa. Hopi hende ta gaba kon mi ta yuda nan. Mi ta yuda hende di edat avansá i ta bai nan hopi bon. Mas tantu e hende hòmber ta bin pa yudansa serka mi. E hende muhé ta presentá ménos p’ami yuda nan. E trabou aki tur dia mi ta hasié durante henter dia. Tin 2 dia mi ta hasi mi kosnan personal parti mainta i otro dianan mi ta duna servisio. Tur dia te 6or mi ta hasi e trabou. Esun ku mester di yudansa por pasa na Kaya Charles J.A. Beukenboom 5, òf por yama pa un sita na number di telefon, 7960520. Mi kurpa ta bon i ainda mi no ta sinti ku mi tin ku stòp di hasi e trabou mas. Pues miéntras e kurpa ta bon mi ta kontinuá. Mi tin bista riba un mucha i mi tin deseo pa konvensé pa e siña hasi e trabou. E ta poko okupá i mi ta spera pronto e ta siña e trabou. Awor mi tin 80 aña di bida i kos nan a kambia kompará ku ántes. Pasa dushi dia di fiesta i dia 20 mi ta stòp i kontinuá yanüari 2021 ku Dios ke”, Raymunda Martis a bisa.     

Share This
error: Content is protected !!