KRALENDIJK – Mas i mas ta bai konstruí kaminda di klenku, despues ku ta notabel ku e ta mas kumbiniente pa diferente motibu. For di despues ku a konstruí e kaminda ku ta bai prison nobo (JICN), tambe e pida kaya ku ta kondusí na kazèrne di brantwer, mas i mas e deseo tei pa usa klenku na lugá di asfalt. El a duna bon resultado i ta kontinuá ku mas kaya di klenku awor.

Kaya Albert Engelhardt ku ta konektá ku Kaya Grandi i Kaya Cachi Craane ta un di esnan ku a wordu drechá kompletamente ku klenku. Awe ta tèrminá e trabounan i ta habri e kaya pa outomobilistanan por kore ariba. Na luna di yanüari 2021 ta kontinuá ku Kaya Aruba, ku tambe ta bai ta konstruí kompletamente ku klenku. Esei ta e plan aktual, pa traha kaminda di klenku loke ta pone ku momentu mester pasa pipa òf kabel na e sitio ku ya tin kaminda trahá, simplemente ta saka e klenku, hasi e trabou i pone e klenku bèk. E trabou ta bai hopi mas rápido ku e tradishonal asfaltamentu di kaya. E ta mas ekonómiko tambe.

Último añanan a usa klenku na diferente krusada ku e rekonstruí. Entre otro krusada na Kaya Monseigneur Nieuwind i Kaya Maximiliana Rosario, Kaya Papa Cornes i Hanchi Amboina, meskos e krusada T na Kaya Gilberto F. Betico Croes i Kaya Internashonal.

Habitantennan den bisindario di Kaya Albert Engelhardt, ta hopi kontentu kon e hendenan ta traha i ta ofresé e trahadónan ku regularidat kos pa freska garganta pa asina haña animo pa kontinuá ku nan trabou den solo kayente manera nan ta bisa. Potrèt ta duna un bista di e trabou. 

Share This
error: Content is protected !!