KRALENDIJK – Dennis Martinus, Angelo Alberto di BYOF i Philip Winkel di Warehouse Supermarket a papia tokante un aktividat ku ta bai tuma lugá entrante otro siman. Dennis a konta kon el a yega na e idea pa yuda hende ku ta den nesesidat, spesialmente e mucha. “Mi a tuma nota di kon pa yuda hendenan di ménos rekurso na Hulanda i Afrika. Ta algu ku mi a kuminsá kuné ya pa hopi aña i e ta simpel kaminda hóbennan ta yuda esnan di ménos rekurso. Hopi hende ta wak loke nos a hasi, pa medio di facebook i ta bin yuda nos. Pues nos ta haña kos for di diferente instansia i nos ta traha pakete i duna muchanan ku ta den nesesidat ku loke nos risibí. Esaki ku e meta pa e hende pasa un fin di aña felis.

E aña aki ta un aña difísil, no solamente pa hende na Boneiru, sinembargo mundialmente. Aña pasa tabata 350 mucha ku a risibí pakete di ayudo. E aña aki Warehouse Supermarket ta bai duna oportunidat pa un persona kore garoshi i piki kos grátis den e supermarket. Tur hende ku hasi kompra na Warehouse, i si nan pone tres artíkulo òf mas destiná pa esnan den nesesidat, esta di ‘Pasku Briante’, pa e partisipá por skibi nan nòmber, adrès i number di telefon patras di e resibu ku bo a haña ora bo a hasi kompra i deposit’é den e tómbola kòrá ku ta bai tin na e sitio. For di e tómbola, ta bai saka un nòmber i esei ta gana e oportunidat pa kore garoshi den Warehouse Supermarket. For di djaluna 14 desèmber di 1’or pa 6’or atardi durante tres dia e hendenan di BYOF ta dilanti di Warehouse Supermarket pa risibí donashon di esnan ku ta deseá pa duna. Djaweps 17 di desèmber ta saka e ganadó pa kore garoshi 1 minüt grátis. Djabièrnè e korementu di garoshi ta tuma lugá.  

Share This
error: Content is protected !!