KRALENDIJK – Fundashon  Akademia Papiamentu tin komo meta protehá, reforsá, fortifiká, i promové papiamentu. Un di e aktividatnan pa logra su meta ta fasilitá kurso di ortografia di papiamentu.

Resientemente a tene kurso tantu na Antriòl komo na Rincon i Mazarella Jansen tabata e dosente. 

Dosente di papiamentu Mazarella Jansen resientemente a bin biba na Boneiru. E ke a duna bèk na pueblo di Boneiru pa e bon trato ku e ta risibiendo akí.  El a aserká Fundashon Akademia Papiamentu i Fundashon Antriol Avanti ku e idea i den koperashon a organisá e kursonan. Na Antriòl a partisipá diessinku persona i na Rincon diesshete.

Riba promé dia di lès yùfrou Mazarella a splika ku su meta ta pa hende dominá ortografia di papiamentu. E ke pa mas hende kontribuí na skirbimentu. Sea ta poesia, letra pa músika, storia òf djis skirbi usando e ortografia ofisial di papiamentu.

Djasabra último a hasi entrega di sertifikado na Antriòl i djadumingu na Rincon.

Di e grupo di Antriòl e persona ku a kaba e kurso ku ménos eror tabata Ludovico Nicolaas. E persona di e grupo akí ku a destaká pa su esfuerso, disiplina i perseveransia tabata Rosalia Alberto.

Diputado Nina den Heyer a entregá e partisipantenan sertifikado i a splika e importansia di papiamentu pa gobièrnu di Boneiru i kon orguyoso e ta di e grupo ku a kaba e kurso ku éksito.

Na Rincon Sr. Papito Thomas, hefe di SKAL a representá Diputado den Heyer i a hasi entrega di sertifikado. El a splika e importansia di bon dominio di ortografia na momentu di komunikashon skirbí. Sea ta un karta, un poesia bo ta skirbi òf letra pa un kantika, ta importante pa skirbié den e sistema di skirbi ofisial di Boneiru esta den e ortografia fonológiko.

Riba promé dia di kurso yùfrou Mazarella a bisa su alumnonan ku na final di e kurso e ke pa nan por skirbi un kantika, deklamá un poesia ku nan mes a skirbi òf skirbi un kuenta. Riba e atardi di entrega di sertifikado Danilo Christiaan a kanta un kantika ku el a komponé yamá Papiamentu. Nochi Coffie a deklamá un poesia dediká na, i titulá Mazarella. Leoncita Sintjago a trese algun charada i chiste dilanti.

Di e grupo di Rincon, Danilo Christiaan i Rosanna Castillo Suero ta e personanan ku a hasi e prueba ku ménos eror. Leoncita Sintjago a sali e persona ku a demostrá mas kurashi pa perseverá ni maske kon difísil tabata pa siña e sistema di skirbi aki.

Fundashon Akademia Papiamentu tambe a felisitá tur e partisipantenan ku nan logro i a gradisí yùfrou Mazarella pa su kontribushon.

Share This
error: Content is protected !!