KRALENDIJK – Gabinete di Hulanda a proponé pa un ‘lockdown’, kaminda ta bai sera práktikamente tur kos pa te otro aña 19 di yanüari 2021. Esaki ta enserá tur skol i tiendanan ku no ta esensial i museo, teater i mas. Esaki ta loke a keda bisá na NOS. E medidanan ta bai na vigor entrante awe djaluna anochi lat. Pa loke ta trata lugánan ku ta hasi masashi i drechamentu di kabei mester sera porta i e hendenan mester keda mas tantu posibel na kas. Skol básiko i skol sekundario entrante djarason awor mester sera porta. Meskos ta konta pa krèshnan. Solamente mayor ku tin un trabou esensia, nan yu por sigui bai krèsh. Awe djaluna atardi lat promé minister Mark Rutte ta bai papia tokante e medidanan. Skolnan di deporte tambe mester sera nan porta. Entre otro djentista i ‘fysiotherapeuten’ pa awor por kontinuá ku nan servisio. Hulanda ta tuma e medida drástiko aki debi ku e kantidat di hende infektá ku Coronavírùs a oumentá drástikamente i esaki tin enorme preshon riba e situashon médiko. Gabinete a spera ku e kantidat di hende infektá ku e vírùs menshoná lo a baha te na un kantidat di 3600 hende infektá pa dia, sinembargo aktualmente ta papia di kasi 10 mil hende infektá pa dia. Hende mester keda mas posibel na kas i mas tantu posibel no risibí bishita. Sea paden òf pafó di kas, solamente 2 persona por bishita un otro. Riba dia di Pasku komo eksepshon por spera 3 persona di bishita na kas.  

Hotèlnan por keda habrí, sinembargo no por sirbi kuminda. Tiendanan ku por sigui duna servisio ta supermerkado i otronan manera banko i lugánan ku tin di aber ku asuntunan médiko. E ora di anochi a papia riba dje, sinembargo no ta aplik’é. 

Share This
error: Content is protected !!