KRALENDIJK – 15 di desèmber a selebrá e tradishonal dia di Nort’i Saliña. E selebrashon no a bai manera kustumbrá debí na e situashon di e pandemia di Coronavírùs. E organisashon ‘Fundashon Nawati’ a honra 4 baluarte di Bario Nort’i Saliña. Miembronan di e fundashon a bishitá kada un di e baluartenan riba e dia. Di e forma menshoná, a entregá e plaka di mérito na esnan rekonosé. Ta trata di 2 dama i 2 kabayero. Cancia Maria Quandt-Thodé, Tecla Piar, Pedro Alexandro Semeleer i Johannes Antonius Francees. 

Cancia Maria Quandt-Thodé ta un desendiente di bario di Nort’i Saliña. Cancia tabata kabes di Maskarada pa basta tempu i tabata tuma na su enkargo e tarea di prepará e piesanan di trahe ku e maskanan tabata bisti. Ademas e tabata sòru pa e grupo tabatin desayuno i kuminda di mèrdia pa nan por a kome ora ku tabata duna presentashon. Tambe e kontakto ku e grupo di tokadónan tabata den su man. Awendia Cancia a laga tur e preokupashon di organisá grupo di Maskarada pa duna presentashon, pa un generashon mas hóben, pero ainda e tradishon ta keda kishikí su sanger di manera ku e ta tuma parti komo un di e maskanan ku ta den e grupo pa duna presentashon.

Sra. Tecla Gregoria Piar- Martillo a nase den e bario di Nort’i Saliña riba 3 di sèptèmber 1937. For di aña 1955 te ku awor sra. Piar ta kordinadó i miembro di kor “Bírgen Maria de Coromoto”. Na okashon di hasimentu di aña di e pastornan, Tecla tabata esun ku tabata sòru pa organisá fiesta. Esaki semper tabata bai kompañá ku entrega di un “plakat” komo muestra di gratitut. Fiestanan di parokia, kaminda e kor tabata presente, Tecla tabata sòru pa aktividat di rekoudá fondo. Ora di kumpleaño di un miembro di kor, e tabata sòru pa tene un sakrifisio di misa i tambe un regalo pa e kumpleaño. Tecla ta esun ku ta organisá henter e aktividat di kor, ora e kor mester a kanta pa un fiesta òf entiero. For di aña 1989 te ku awor sra. Piar ta boluntario di e grupo “60+ flor di Orkidia”. Pa mas ku 30 aña kaba Tecla ta aktivo ku e tarea di pone tur kos kla ora tin enkuentro. Tambe e ta sòru pa bebida i snèk. E grandinan ta bin huntu dos biaha pa luna. E enkuentronan ta dura tres ora. Tecla ta yuda ku amor i for di su mes saku e ta kumpra kos di bebe i kome pa 32 miembro, sin eksigí ku mester paga bèk. Tecla tin hopi influensia positivo riba e grandinan. For di 1994 te algun aña pasá sra. Piar tabata organisadó di e “Festival di kanto di mama” huntu ku su ruman Juliana Angela. E ganashi di e anochinan tabata un donashon pa misa katóliko Coromoto na Antriol. Nan tabata organisá diferente aktividat pa por a realisá e festival akí entre otro buska artistanan for di Kòrsou i Aruba pa aktua komo “Guest Star”.

Bario di Nort’i Saliña a produsí diferente dosente òf mener ku yùfrou di skol. Pedro Alexandro Semeleer ta un di nan. Alex òf Papa òf Tio Paps manera su subrinonan ta bisa, a nase den nos bario riba 26 di novèmber 1942. Alex a traha komo negoshante bendiendo paña, sapatu, produktonan esotériko i produktonan di medisina natural. Banda di esaki Alex tabata ofresé a base di uso di kòmpiuter kurso di idioma hulandes, ingles i papiamentu pa estranhero. Huntu kuné den su aktividat komo negosiante ta na su banda Ana Ruviela Gonzalez (Faisul) ku kende Alex tin 23 aña kasá kaba. Papa ta tambe ko-fundadó di Sentro di Bario Nikiboko i alabes di nos fundashon Nawati.

Riba 06-08-1935 Johannes (Papa) Antonius Francees a nase den e bario di Nort’i Saliña. Papa a drenta servisio di Gobièrnu komo arbeidscontractant na 1955 hasiendo trabou di atministrashon pa yega ta na e funshon di Grefi di Korte di Hustisia na momentu di a baha ku penshun. Den su trabou e tabata konsehero spiritual i sosial pa hopi hende. Papa ta un di e fundadónan di futbòl klup Estrellas i e tabata promé presidente, riba10-02-1960, huntu ku Shon Bubu Thielman, Piet Semeleer, Prospero Silberie, Prisio Martijn, Silvano Cicilia i Humberto Winklaar. Tambe Papa tabata e promé presidente di Sentro di Bario Nort’i Saliña. Sentro di Bario tabata tambe sentro for di unda Papa i su kasá Annamaria (Annie) a kuminsá ku aktividat sosial di e klup Palabra di Bida pa hóben. Nan tabata organisá diferente aktividat den kuadro di motivashon pa bon desaroyo komo siudadano i kristian i tambe aktividat deportivo. Hopi hóben a asistí na nan aktividatnan i a krea un bon base pa un bon siudadano di Boneiru awendia. Papa ta un lider aktivo tambe riba tereno religioso. El a hasi estudio di beibel via kurso di Moody Bible Institute, a risibí su ordenansa komo pastor na desèmber 1999, tabata den direktiva di Iglesia Aliansa Evangelika Ebenezer. Tambe e ta ko-fundadó di e Asosiashon di Pastornan Evangelica Kompleto Boneiru i el a lanta Iglesia Fuente di Awa Bibu na 1972. Na su kas ta tene enkuentronan di e último iglesia akí.

Esaki ta esnan ku a keda rekonosé i a un plaka di mérito komo Baluarte di Bario Nort’i Saliña na okashon di selebrashon di Dia di Nort’i Saliña 2020 for di ‘Fundashon Nawati’.

Share This
error: Content is protected !!