KRALENDIJK – Apesar di e situashon di Coronavírùs, moveshonnan ta sigui pa lokual ta e agrupashon musikal nobo ku último tempu tabatin vários rumor i komentario tokante di dje. Despues di tabata den studio di grabashon i a graba nan videoclip, awe Boneiru ta sera konosí ku e banda nobo. Ta asina ku algun luna pasá Jairo Evertz tabata na Boneiru ku vakashon i den un kombersashon ku Philip Bernabela a kuminsá hunga ku e idea pa lanta un banda nobo aki na Boneiru. Nan a aserká entre otro Gregory Obersi pa duna un man pa kuminsá e proyekto nobo aki. Tambe a aserká e maestro Dwight Leoneta pa yuda guia e banda nobo. No a dura muchu ku e proyekto a mira lus di dia pa despues a kuminsá aserká diferente integrante. Tin di bisa ku tur músiko ku a wòrdu aserká, mesora tabata kla pa un reto nobo.

E banda ta konsistí di e siguiente integrante nan:
Den frònt komo kantante: Semariel (Semii) Marten, Luiginio (Luis Moka) Molina i Gerald (Gerr) Alberto;

Drùm: Maroef Lamidi, Konga: Brian Nicolaas, Brass: Philip Bernabela, Bass: Robert Felida (Direktor Musikal), Piano: Marvelous Molina, Direktor Tékniko: Gino Offerman i na último momentu tambe a disidí djòin e tim tras di keyboard: Almahir Nicolaas.

E banda ku eksepshon di Philip i Gino ta konsistí di hóben nan talentoso ku ta den flor di nan hubentut ku gana pa siña i mehorá nan mes ku músika. E idea ta pa guia e hóben nan aki pa nan sigui karga e kultura i músika di nos dushi isla.

E nòmber ku e banda nobo tin ta: Payola… A pensa di sali fuerte mesora ku no solamente lansa e banda, sino huntu kuné lansa un piesa ku su videoclip huntu. E kantika nobo ta titulá: ”Voorgoed” i ta kantá pa Luis Moka i Gerr. E kantika nobo aki a wòrdu produsí pa Dwight Leoneta i skibí pa Dwight Leoneta i Quincy Commenencia. E videoclip a wòrdu grabá i editá pa Judeaniro de Jongh. Por hañele riba youtube via Payola – Voorgoed. E videoclip ta wòrdu estrená awe djaweps 17 di desèmber pa 2’or di atardi.

Pa mas informashon òf pa reservashon, por tuma kontakto ku Tania Obersi na payolaofficial@gmail.com òf bishita e facebook page www.facebook.com/payolaofficial

Share This
error: Content is protected !!