KRALENDIJK – Trio Los Principes, un di e poko trionan aki na Boneiru ya ku no tin mashá trio aki na Boneiru, djamars último 15 di desèmber 2020, a rekordá i selebrá den seno familiar mas bien, e echo ku 30 aña pasá e trio aki a keda fundá pa brinda Boneiru i islanan ruman i tambe mas leu den eksterior, nan músika estilo úniko, kompañando tambe masha masha hopi kantante invitá kua parti mundu ku nan a pasa, tambe aki na kas mes.

E selebrashon a kuminsá ku palabranan di e direktor musikal/ doño di e trio aki ku ta sr. Calixto Coffie.

Spesialmente pa e okashon aki tabata presente e hulandes oropeo sr. Arthur Masselink ku por bisa tin 30 aña tambe komo fiel fanátiko di e trio aki i asta unda ku e por a yuda, e la yuda tambe.

Tambe sr. Masselink ku ta na Boneiru entre otro spesialmente pa e okashon aki, a dirigí su mes na e músikonan di e trio i tambe e miembronan di famia ku tabata presente.

Tambe sr. Masselink a hasi entrega di regalu na e miembronan di Trio Los Principes, pa na finalmente sra. Gertruida Coffie, esposa di sr. Calixto Coffie, a hasi entrega tambe di un regalu komo rekuerdo di e okashon aki na sr. Masselink.

Sr. Masselink ku a duna Ibi Piar e nómber di Het Boneriaanse Tom Jones, a pidi tambe pa Ibi habri e anochi di deleite musikal pa e okashon aki, ku e kantika ku e la bira konosí p’é den gremio di hulandes orepeonan ku sèmper ta huntu ku Trio Los Principes entre otro na Lac, ku e kantika “Green Green Grass of Home” di Tom Jones.

Ta bon pa menshoná ku Trio Los Prinsipes a konosé hopi músiko pero ketu bai e trio tei.

Na e okashon aki e direktor musikal/doño sr. Calixto Coffie, a yama danki na tur ku a yuda i toka un temporada ku e trio.

Tambe a rekordá esnan ku awe no tei mas huntu ku nos.

Riba potrètnan parti dje selebrashon di 30 Aña Trio Los Principes

Share This
error: Content is protected !!