Kralendijk – “For di promé di novèmber, nos tabatin na tur binti hende ku a keda infektá ku Coronavírùs. Despues di sinku siman, ku un promedio òf 3 infekshon, siman pasá nos a mira 8 infekshon nobo na Boneiru. Danki Dios na e momentu akí, ku bon investigashon di fuente i kontakto, nos sa orígen di mayoria di e infekshonnan i por evitá mas infekshon.” Esaki ta loke dr. Marian Luinstra Passchier a bisa ayera durante enkuentro ku prensa.

“Den e periodo akí, nos tabatin kuater klùster, pues kuater grupo di infekshon. Tur  kuater, a kuminsá ku un hende ku a keda infektá na Kòrsou. Tin bia tabata trata di un hende di Boneiru, òf tin biaha  un hende di Kòrsou ku pa un tempu kòrtiku tabata aki.  

Banda di esei, tabatin seis infekshon lòs. Dos a keda infektá pafó di Boneiru, di 4 otro, nos no sa kua ta e fuente.  

Den e siguiente grafik ariba, ta mira ku mayoria hende ta keda infektá na trabou. Hendenan ta keda infektá na kas tambe òf serka amigu. 

Nos ta preokupá ku e kontakto di hendenan. Den nos investigashon di kontakto, nos ta mira ku hendenan ku a keda infektá, den e dianan promé tabatin kontakto ku masha hopi hende. Hopi biaha nan tabatin kontakto tambe den grupo grandi. Hendenan no ta tene nan mes bon na medidanan. I asina nos ta kore riesgo ku un infekshon ta kondusí na hopi infekshon mas. 

E simannan ku ta bini, ta bira interesante. Temporada di Pasku ta den kurpa. Tantu na Kòrsou komo na Hulanda tin un brote grandi. 

Banda di esei, nos ta mira turismo ta oumentando. Mi ke pidi boso komo dòkter pa evitá grupo grandi i selebrá e dianan di fiesta den grupo chikitu. No brasa otro hende i tene distansia. Si bo tin fèrkout, no bai un sena di Pasku òf fiesta. 

Huntu ku dòkternan di kas, Fundashon Mariadal, Ministerio di Salubridat Públiko, Bienestar i Deporte i otronan, nos ta prepará nos pa e bakunashon kontra COVID-19. Nos ta hasi esei pa despues bakuná mas tantu hende posibel na Boneiru. 

Hende grandi, hendenan ku malesa króniko i personal di kuido ta bai promé. Ya nos tin algun luna ta preparando i awor e preparashonnan ta bai mas rápido. Nos mester tin sigur ku tur kos ta bon reglá promé ku nos kuminsá. Asina nos tin mas detaye, nos ta laga boso sa esei”, Marian Luinstra Paschier a bisa.  

Share This
error: Content is protected !!