KRALENDIJK – Hues mr. Van Lieshout a tuma kasi henter dia pa tratamentu di e kaso di hinkamentu kaminda Rafelino Boezem a pèrdè su bida akonsekuensia di hinkánan. Hues a splika ku na e sitio di e delito, tabatin hopi sanger i a topa ku un kuchú kabu bèrdè. E Spornan riba e kuchú ta indiká di ku ta di e víktima. Famia di e víktima a bisa ku nunka nan a mir’é ku e kuchú. E pregunta ta; ken a mata Rafi?

Tin un informashon ta sirkulá, un deklarashon anónimo i polis no a konsider’é konfiabel pa a sigui e investigashon den e direkshon. Ta bisa Dayerona a tene Rafi, i rasta Felipe a mat’é. Durante tratamentu di e kaso a kuestioná e investigashon di parti di polis. Tantu wela di Rafi komo e yu menor di edat di e víktima a deklará na polis ku Rafi a bisa nan ken a hink’é ku kuchú. “Ma, nan a hinkami. Ta Rasta Felipe”, e wela a bisa polis. E yu menor di edat a bisa polis ku e a mira un hòmber rasta kore bai for di e sitio. Tambe a menshoná nòmber di Felipe W. i su señora Valerie N., durante investigashon, sinembargo polis no a duna atenshon na e hendenan menshoná. No a papia ku nan tampoko. Ta hopi difísil pa komprondé dikon polis no a hasi investigashon riba e nòmbernan menshoná.

Hues Van Lieshout a bisa ku ta algun dia pasá a agregá deklarashon di e wela den e ekspendientenan penal. Segun ministerio públiko nan ta traha ku e prosedura stándart i e fuente mester ta konfiabel. E kos ta ku e akusado i e otronan ku tabata den besindario no a tuma nota di un otro persona enbolbí den e kaso. Hues Stephan Van Liieshoud no tabata satisfecho ku no a pone e deklarashon di e wela den e dosié. Despues di papiamentu di Hues i fiskal, abogado defensor mr. Marielle Verkade a suprayá e echo ku e investigashon no ta kompletu. Fiskal a posponé e kaso i a bisa ta mihó pa no sigui papia den huisio públiko i bai serka hues komisario.

INFORMASHON TOKANTE KUCHU  

A haña un kuchú pretu na kaminda Gurubu, esaki tabata esun ku Dayerona a tira kantu di kaminda despues di e suseso. Segun investigashon hasí pa instituto forénstiko di Hulanda, e kuchú ku Dayerona tabatin, no por a okashoná 2 di e hinkánan ku e víktima tabatin. Esaki mirando e hanchura di e kuchú i e profundidat di e heridanan. NFI a hasi investigashon riba paña di e akusado i a resultá ku tabatin DNA di e víktima i e akusado, mas un otro persona. E muestra no ta apto pa hasi investigashon riba e di tres persona. A haña pida flèktu di kabei falsu ku ta pertenesé na e akusado. Segun deklarashon di Rogelio Boezem, e anochi el a tende e akusado grita: “Ma hink’é, ma hink’é.” Otro kos, el a mira 2 persona; un hòmber i un muhé kore bai for di e sitio. Hues a remarká ku e akusado a keda interogá 5 bia, i kada un deklarashon ta diferente. Sea a bin algu aserka òf ta algu diferente for di e otronan. Dayerona a bisa hues ku esei a sosodé, debí ku no tabatin un intérprete presente. “polis a skirbi loke nan tabata deseá”, Dayerona a bisa. 

Share This
error: Content is protected !!